АҞӘА, рашәара 20 - Sputnik. Аԥсны Аҳәынҭқарра Ахада Аслан Бжьаниа Аԥсны агәабзиарахьчара асистема аусзуҩцәа гәыԥҩык рзанааҭтә ныҳәа амш аҳаҭыр азы аҳаҭыртә хьыӡқәа рхиҵеит ҳәа аанацҳауеит атәыла ахада иофициалтә саит.
Убри азы Аслан Бжьаниа Аусԥҟақәа инапы рыҵаиҩит.
Убас, акороновирустә чымазара ҿкы COVID-19 алаҵәара иаҿагыланы ақәԥараҟны рлагаламҭазы, рыпрофессионализм ҳаракы азы "Аԥсны Аҳәынҭқарра зҽаԥсазтәыз аҳақьым" ҳәа аҳаҭыртә хьӡы рыхҵоуп гәдоуҭатәи аҳақьымцәа:
- Инга Ҷанԥҳа - Гәдоуҭа ақалақь Асанитартә-епидемиологиатә станциа аҳақьым хада;
- Нонна Ҳалбадԥҳа – Гәдоуҭатәи араионтә хәышәтәырҭа хада аҳақьым-анеонатолог;
- Ельвира Царгәышԥҳа – Гәдоуҭатәи араионтә хәышәтәырҭа хада аҳақьым-аневролог.
Иара убас агәабзиарахьчара асистемаҟны акыршықәсалатәи ламысцқьала русуразы "Аԥсны Аҳәынҭқарра зҽаԥсазтәыз амедицина аусзуҩы" ҳәа аҳаҭыртә хьӡы рыхҵоуп Пицундатәи ақалақьтә хәышәтәырҭа аусзуҩцәа: Галина Конџьариаԥҳа - арентген-лаборант, Лидиа Харина - афельдшер-лаборант, Антонина Кухтина – афельдшер, Пицундатәи ақалақьтә хәышәтәырҭа ацхыраара ласы адиспетчер.
Агәабзиарахьчара аусхк аҟны рылшамҭақәеи шықәсырацәалатәи ламысцқьала русуразы "Аԥсны Аҳәынҭқарра зҽаԥсазтәыз амедицинатә усзуҩы" ҳәа аҳаҭыртә хьӡы рыхҵоуп Аҟәа ақалақь аҳақьымцәагьы:
- Ада Абыхәԥҳа – Аҟәа ақалақь ахәыҷтәы поликлиника аҳақьым-апедиатр, аҳақьым хада;
- Инесса Михаилова – Аҟәа ақалақь ахәыҷтәы поликлиника аҳақьым-аокулист;
- Инга Ԥиԥиаԥҳа – Ареспубликатә хәышәтәырҭа ашьадатә хирургиеи антиологиеи рыҟәша аҳақьым;
- Еҭери Сниада – Аҟәатәи ақалақьтә поликлиника аҳақьым-аокулист;
- Есма Сарсаниаԥҳа – Аҟәатәи ақалақьтә поликлиника аҳақьым-аоториноларинголог;
- Лиудмила Ҭарԥҳа – Аҟәатәи ақалақьтә хәыҷтәы поликлиника аҳақьым-апедиатр;
- Олимпиа Чаклова – Аҟәатәи ақалақьтә хәыҷтәы поликлиника аҳақьым-апедиатр;
- Арутиун Чакриан – Аҟәатәи ақалақьтә поликлиника №3 аҳақьым-ауролог;
Аслан Бжьаниа Иусԥҟала, акороновирустә чымазара ҿкы COVID-19 алаҵәара иаҿагыланы ақәԥараҟны илагаламҭазы, шықәсырацәалатәи ламысцқьала лусуразы "Аԥсны Аҳәынҭқарра зҽаԥсазтәыз амедицинатә усзуҩы" ҳәа аҳаҭыртә хьӡы лыхҵоуп. Галина Аргәынԥҳа - Гәдоуҭа ақ. Асанитартә-епидемиологиатә станциа асанитартә ҳақьым ицхырааҩ.
