АҞӘА, ԥхынгәы 23 - Sputnik. Михаил Логәуа "Амшынеиқәафымцамч" адиректор хада имаҵураҟынтәи ихы дақәиҭыртәит. Абри азы аусԥҟа лнапы аҵалҩит аԥыза-министр ихаҭыԥуаҩ, аекономика аминистр Кристин Озган ҳәа аанацҳауеит "Аԥсныпресс".
Логәуа АУН "Амшынеиқәафымцамч" адиректор хадас дҟаҵан 2020 шықәса ԥхынгәы 17 азы. Ари аҭыԥ аҿы иара диԥсахит Аслан Басариа.
1993 шықәса ԥхынҷкәынмзазы афымцатә цәаҳәақәа Русбарҭа ашьаҭала иаԥҵан Аԥсны аенергетика аминистрра.
1995 шықәса жәабранмзазы Аԥсны аенергетика аминистрра аҭыԥаҿ еиҿкаан Аҳәынҭқарратә еилахәыра "Аԥсныфымцамч", иара убри ашықәс азы аилахәыра ашьаҭала иаартын Аҳәынҭқарратә акционертә еилазаара "Амшынеиқәафымцамч". Иахьа аилахәыра аунитартә наплакы астатус амоуп.
