АҞӘА, ԥхынгәы 30 – Sputnik, Асмаҭ Ҵәыџьԥҳа. Афорум аҳәаақәа ирҭагӡаны имҩаԥган еиуеиԥшым аиԥыларақәа. Аҳәаанырцәтәи аилахәырақәа рхаҭарнакцәа жәпаҩык Аԥсны ахь аинтерес аадырԥшит ҳәа арадио Sputnik иазеиҭеиҳәеит Адәныҟатәи аусқәа рминистр Даур Ақаҩба.
Иара иажәаәқа рыла 60 тәыла рҟынӡа реилахәырақәа рхаҭарнакцәа асаммит иалахәын.
"Аиԥыларақәа аибадырратә ҟазшьа рыман. Ҳара Аԥсны иазку аинформациа ҭбаа раҳҭеит. Уажәы ирзаҳашьҭуеит иҵегь ихарҭәаау аиформациа дара азҿлымҳара зырҭаз ахырхарҭала. Ирзеиҭаҳҳәеит жәларбжьаратәи аилазаара аҟынтә иҳамоу аҭахкаара, уи мзызқәас иамоу ртәы, аусеицура амеханизмқәа ҳарзааҭгылеит", - иҳәеит аминистр.
Ақаҩба иҳәеит, аиҿцәажәарақәа раан ишизцәырҵыз ахшыҩҵак ас еиԥш иҟоу ауснагӡатә Аԥсны аиҿкаараз.
"Атәыла анапхгара адырра раҳҭап. Иалшозар ашықәс нҵәаанӡа ауснагӡатә еиҿаҳкаап, асаммит иалахәыз атәылақәа рлахәылацәа адыԥхьаланы", - иҳәеит иара.
ХII Жәларбжьаратәи аекономикатә саммит "Россия - Исламский мир: KazanSummit 2021" хыркәшахеит ԥхынгәы 29 рзы. Иара убас, асаммит аҳәаақәа ирҭагӡаны иалацәажәеит ааглыхратә робототехника, акороновирус аамҭазы амедицина азҵаарақәа алоббизм аҟаҵара, адин амедиа қәыԥшылараҟны уҳәа убас егьырҭгьы.
