Амчра ахаҭарнакцәа рганахь ала амч рхы иадырхәеит ҳәа агәызҩара ззыҟоу ауаа аанкылоуп

© Sputnik / Томас ТхайцукПрокуратура Сухума
Прокуратура Сухума  - Sputnik Аҧсны, 1920, 14.10.2021
Анапаҵаҩра
Ахҭыс аҭыԥ аман жьҭаара 12, Аҟәа ақалақь аҿы.
АҞӘА, жьҭаара 14 - Sputnik. Амчра ахаҭарнакцәа рганахь ала урҭ рыԥсҭазаареи ргәабзиараеи ашәарҭара иҭазыргылоз амч рхы иадырхәеит ҳәа агәызҩара ззыҟоу ҩыџьа атәылауаа аанкылоуп, ҳәа аанацҳауеит Апрокуратура хада асаит.
Жьҭаара 13 азы Аҟәа ақалақь апрокуратура ашьаус хацнаркит Ҳаџьараҭ Ԥачлиеи Руслан Гамгьиеи рганахь ала Аԥсны Ашьаустә Закәанеидкыла ахәҭаҷ 320 инақәыршәаны (Амчра ахаҭарнакцәа рганахь ала урҭ рмаҵзуратә напынҵақәа анынарыгӡоз рыԥсҭазаареи ргәабзиараеи ашәарҭара иҭазыргылоз амч ахархәара).
Ахҭыс аҭыԥ аман жьҭаара 12, асааҭ 16:30 рзы Аҟәа ақалақь аҿы.
"Аҟәа ақалақь ААР ОУР аусзуҩцәа Кәыдрытәи амҩаду аҿы апрофилактикатә уснагӡатәқәа анымҩаԥыргоз, абжьаратә школ №14 ааигәара автомашьына "Тойота Альфард" аԥсҟы зкыз амҩатә ԥҟарақәа дрызхьамԥшыкәа асветафор аҟаԥшь шаркыз дымҩасит", - ҳәа азгәаҭоуп ахҭыс азы адырраҭараҿы.
Амашьына аԥсҟы зкыз Ԥачлиеи апассаџьыр Гамгьиеи амилициа рыдҵа, амедицинатә гәаҭара ахысра мап ацәкны амчра рхы иадырхәеит. Азинхьчаратә усзуҩцәа аахақәа рыҭан.
Уажәазы арҭ аҩыџьа аанкылоуп. Рырбаандаҩразы Аҟәатәи ақалақьтә ӡбарҭахь азыҳәа нашьҭхоит.
Ажәабжьқәа зегьы
0