Аб Никита еиҭеиҳәеит Нанҳәазы аишәаргылара дшазыҟоу
Аб Никита еиҭеиҳәеит Нанҳәазы аишәаргылара дшазыҟоу
Анапаҵаҩра
Аиереи Никита (Адлеиба) арадио Sputnik аефир аҟны иҳәеит Нанҳәа аҽны аишәаргылара дшазыҟоуи, аныҳәа аҵаки, уи аан ахымҩаԥгашьеи ртәы дырзааҭгылеит.
Нанҳәа 28 аҽны Аԥсны иазгәарҭоит Нанҳәа - Анцәа иан лылацәеиқәыԥсара амш.
"Ацқьа Мариа дымԥсӡеит уҳәар ҟалоит, лылацәақәа еиқәылԥсеит наунагӡа жәҩангәашәԥхьара дцарц. Нанҳәазы иргәаладыршәоит Анцәа иан лцәагьы-лыжьгьы жәҩангәашәԥхьара ишгаз, лара адунеи зегьы иқәынхо дрануп ҳәа иԥхьаӡоуп… Исгәалашәоит, саныхәыҷыз сан ари аҽны аишәа лыргылон, хаз ҷыдала ларгьы (Анан Мариа-азгәаҭа) лхәы ықәлыргылон. Аԥсуаа иҟарҵо аҵакы амоуп, ақьырсиан динхаҵара иадҳәалоу инҭырфаҷааны, инҭырҳәацааны амала ирыздырӡом ҵаҵӷәыс иамоу, иахьынтәиааз. Иаса Қьырсагьы аџьар данкыдырҵа, жәҩангәашәԥхьара данхала, иҵаҩцәа акрыфара иантәа, Қьырса изгьы ачаса ықәырҵеит… Сгәаанагарала, издыруа, исаҳахьоу ала ари аҽны аишәа ургылеит ҳәа акгьы амаӡам… Аԥсуаа ҳҟны асакәмал ахҵара, акәиц ацәашьы ақәҵара аҵак ду амоуп. Ииашаҵәҟьаны Ҳазшаз игәаԥхоит ҳәа сыԥхьаӡоит, избанзар Ҳазшаз аџьшьара ирҭоит, иҭабуп ҳәа иарҳәоит, имҵахырхәоит, иҳәоит. Нанҳәа - Анцәа иан лылацәеиқәыԥсара, аамҭалатәи лыдунеи аԥсахра ауп, ахымш рзы лцәагьы-лыжьгьы ыҟамкәа жәҩангәашәԥхьара ихалоит. Ауахәамаҟны ауаа неиуеит, ацәацқьа иалху ацәашьқәа рбылуеит. Ацәашьы лаша-лашауа ибылуеит. Убас дыҟазароуп ақьырсиангьы: ҳхазы адәы ҳақәымзароуп, ҳҩызцәа, ҳауацәа, ҳҭахцәа рзы ҳаҟазароуп. Цхыраарала, бзиабарала ҳҩыза ҳихәо ҳаҟазароуп", - иҳәеит аиереи Никита.
Аицәажәара иаҳа инеиҵыхны ишәаҳар шәылшоит аудиофаил аҟны хыхь.
