Аԥсны иҟоу Россотрудничество аџьынџьуаа агрантқәа роураз аицлабра рыланаҳәоит
19:17 03.03.2023 (ирҿыцуп: 20:09 03.03.2023)
© Sputnik / Нина Зотина
/ Анапаҵаҩра
Россотрудничество аицлабрахь арзаҳалқәа рынашьҭара алшоит хәажәкыра 1 инаркны 19 рҟынӡа.
АҞӘА, хәажәкыра 3 - Sputnik. Аԥсны иҟоу Россотрудничество аџьынџьуаа агрантқәа роураз аицлабра рыланаҳәеит. Абри атәы арадио Sputnik аҟны иҳәеит атәылаҟны иҟоу ахаҭарнакра аиҳабы Дмитри Федотов.
"Ҳџьынџьуаа руаажәларратә еиҿкаарақәа ацхыраара рыҭаразы хықәкыс иҟаҵаны ари аицлабра есышықәса имҩаԥаагоит. Ҳара уажәы алаҳәара ҟаҳҵеит, арзаҳалқәа еизаҳгоит, аха агрантқәа нагӡахоит 2024 шықәсазы", - ҳәа иҳәеит Федотов.
Аицлабраҿ иалырхуа апроектқәа:
Аурыс бызшәеи Жәлар ракзаареи рныҳәа мшқәа рҳәаа иҭагӡаны ауснагӡатәқәа рымҩаԥгара;
Аԥсны инхо аицџьынџьуааи урҭ реидгылақәеи, Урыстәыла иалҵыз ауаа Аԥсны аргылара, аекономика, акультура рыҟны рлагаламҭаз аматериалқәа рҭыжьра;
Аԥсны инхо аицџьынџьуаа рбызшәатә акзаара аиқәырхара иазырхоу акультура-гуманитартә уснагӡатәқәа рымҩаԥгара;
Аԥсны инхо аицџьынџьуаа ретнокультуратә акзаара аиқәырхара иазырхоу акультура-гуманитартә уснагӡатәқәа рымҩаԥгара;
Урыстәыла аҭоурых, акультура, аиубилеитә рыцхәқәа ирызку ауснагӡатәқәа рымҩаԥгара.
Агрант 2 000 доллар еиҳахом. Россотрудничествеи Ацҳаражәҳәарҭеи рхаҭарнакцәа рыла ишьақәгылоу акомиссиа иреиӷьу апроектқәа алхны Москва аофис хадахь идәықәырҵоит.
Россотрудничество аицлабрахь арзаҳалқәа рынашьҭара алшоит хәажәкыра 1 инаркны 19 рҟынӡа. Арзаҳалқәа рыдыркылоит аелектронтә формала Россотрудничество Ахаҭарнакра аԥошьҭахь - abhazia@rs.gov.ru.
Аицлабратә программаз аофициалтә информациа аиура алшоит телеграм-канал "Гранты Россотрудничества. Абхазия" аҟны.
