Аԥсны ААР ареспублика аҳәаанырцәтәи ацҳаражәҳәарҭақәа русура арҿыцуеит
© Foto / Вальбаро
Анапаҵаҩра
Аӡбамҭа рыдыркылеит Аԥсны ААР аттестациатә комиссиа Урыстәыла иҟоу Аԥсны Ацҳаражәҳәарҭаҟны аусура алкаақәа инарықәыршәаны, агәаҭарақәа иаадырԥшит ацҳаражәҳәарҭа аусураҿы аиқәымшәарақәа шыҟоу.
АҞӘА, хәажәкыра 6 - Sputnik. Аԥсны ААР ареспублика аҳәаанырцәтәи ацҳаражәҳәарҭақәа русура арҿыцраз ауснагӡатәқәа шьақәнарӷәӷәеит ҳәа аанацҳауеит аусбарҭа Амедиацентр.
Аусбарҭа аттестациатә комиссиа Урыстәыла иҟоу Аԥсны Ацҳаражәҳәарҭаҟны имҩаԥнагаз агәаҭарақәа иаадырԥшит аиқәымшәарақәа шыҟоу, убри инамаданы ирыӡбеит анаҩстәи ауснагӡатәқәа рыдыркыларц:
иаԥҵахоит аицлабартә комиссиа зусушьа бзиоу адипломатцәа иаартны ралкааразы;
ацҳаражәҳәарҭақәа русзуҩцәа еиқәыршәахоит ҳаамҭа иақәшәо ахархәагақәа рыла, Урыстәыла иҟоу Аԥсны Ацҳаражәҳәарҭаз авидеоконференциаеимадараз (ВКС) ахархәага аархәахьеит;
ирӷәӷәахоит афинанстә леишәа, аминистрра афинанстә ҳасабырба амҩаԥгашьа хылаԥшра анаҭалоит;
ацҳаражәҳәарҭақәа рмазара хра аманы рхархәара еиҿкаахоит. Иазгәаҭоуп уаанӡа аҭыԥ шамаз Урыстәыла иҟоу Аԥсны ацҳаражәҳәарҭа аҳәынҭмазара хра амамкәа ахархәара шазуз;
иалагалахоит аусзуҩцәа русуратә ҭыԥ аҿы рыҟазаара ма рыҟамзаара ашьақәыргыларазы аелектронтә система, аусзуҩ иусуратә ҭыԥ аҿы мзызда иҟамзаара аџьатә закәанԥҵара еиланагоит, иусура иамхразгьы иҵаҵӷәхоит;
иалагалахоит аштаттә ак – Урыстәыла иҟоу Аԥсны ацҳаражәҳәарҭа ашәарҭадара азҵаарақәа рзы атташе.
Аԥсны АШәМ аусзуҩ абри ахырхарҭаҿ акомплекстә усурақәа мҩаԥигалоит. Уи икандидатура АШәМ ахантәаҩы далархәны иҳәаақәҵахоит.
Адәныҟатәи аусқәа рминистр Инал Арӡынба иазгәеиҭеит ацҳаражәҳәарҭа хатәы еилахәыраны ишыҟам, аусзуҩ иаҭара ма иамхра шымҩаԥгахало имаҵзуратә инструкциақәа шынаигӡо инақәыршәаны.
