Анқәаб изеиҭарҳәеит Аԥсны араионқәа рҿы аобиектқәа рыргылареи рремонти рзы апланқәа ртәы
09:00 21.07.2023 (ирҿыцуп: 14:48 21.07.2023)
© Sputnik / Томас Тхайцук
Анапаҵаҩра
Аусурақәа мҩаԥгахоит ареспубликатә биуџьет ахатә ԥарақәа рыла. Азеиԥш харџь – 270 млн мааҭ.
АҞӘА, ԥхынгәы 21 - Sputnik. Аԥсны араионқәа рҿы аремонт-ргыларатә усурақәа шцо иалацәажәеит аԥыза-министр Александр Анқәаби, Акапиталтә ргылара аусбарҭа аиҳабы Ҭемыр Агрбеи, АУН "Аԥсныргылара" адиректор хада Руслан Тәанбеи.
Аусурақәа мҩаԥгахоит ареспубликатә биуџьет ахатә ԥарақәа рыла. Азеиԥш харџь – 270 млн мааҭ. Аобиектқәа рсиа Аминистрцәа реилазаараҟны ишьақәырӷәӷәоуп. Иааиуа амшқәа инадыркны ареспублика арегионқәа зегьы рҿы аусурақәа ирылагараны иҟоуп.
Аҟәа ақалақь аҿы аԥаразоужьра – 22 млн 300 нызқь мааҭ.
Иазԥхьагәаҭоуп:
ашкол №7 аспортзал аремонт,
Март 4 амҩеи Лашәриа имҩеи ршьаҭанкылатә ремонт,
Чехови Кәыҵниеи рымҩақәа акаҭран рықәҵара, Кәыдрытәи амҩаду ахәҭақәа ҩба акаҭран рықәҵара.
Гагра араион аҿы:
Пицунда ахәыҷбаҳча "Алашареи" Ахьӡ-аԥша апарки рҵакыраҿы ахәыҷқәа рзы ахәмарырҭақәа рыргылара – 2 млн 400 нызқь мааҭ;
аиланхарҭа Бзыԥҭа аҿы аихшаратә фымцацәаҳәақәа ршьаҭанкылатә ремонт – 5 млн мааҭ;
Чагрыԥшь ақыҭан аӡымҩангагатә ҳа шьаҭанкылатәи аремонт – 1 млн 274 нызқь мааҭ;
Гагра Лакоба имҩеи Аҟәатәи амҩадуи рыхәҭақәа каҭранла рыхҩара – 8 млн мааҭ.
Гал абжьаратә школқәа №1, №2 рремонт ҟарҵоит - 8 млн 664 нызқь мааҭ.
Гәдоуҭа араион аҿы:
Дәрыԥшь ақыҭан ТП №201, 214 рҿы аелектромонтажтә усурақәа – 6 млн 124 нызқь мааҭ;
Аацы, Ҟәланырхәа, Оҭҳара, Хәаԥ рҿы астадион маҷқәа рыргылара - 21 млн 995 нызқь мааҭ;
гәдоуҭатәи ашкол №5 аремонт - 1 млн 800 нызқь мааҭ.
Гәылрыԥшь араион:
Ԥшьаԥ ақыҭа амшын аԥшаҳәа акапиталтә ремонт – 4 млн 250 нызқь мааҭ;
Ареспубликатә психиатриатә хәышәтәырҭа ахыбрақәак ркапиталтә ремонт – 3 млн 740 нызқь мааҭ;
Ареспубликатә агәыҵәкраҿагыларатә диспансер азы аӡыржәтә еизакырҭа –7 млн мааҭ;
Ҵҟыбын ақыҭан аӡыҵхырҭақәа хԥа ркылҵәара - 1 млн 500 нызқь мааҭ;
аелектротрансформаторқәа рыԥсахра – 1 млн мааҭ;
Ԥшьаԥ ақыҭан цанбекәаратәи ашкол аремонт – 2 млн 200 нызқь мааҭ;
Дранда ахәыҷбаҳча "Ҟәараса" аҿы ахәыҷқәа рыхәмарырҭа аргылареи Уарча астадион маҷ аргылареи – 6 млн 200 нызқь мааҭ.
Очамчыра араион аҿы:
Џьгьарда ақыҭа афельдшер-акушертә пункт ахыркәшара – 2 млн 500 нызқь мааҭ;
Ҷлоу ақыҭан аӡымҩангага ҳақәа ркапиталтә ремонт – 13 млн мааҭ;
Баслахә, Ԥақәашь, Ҭхьына астадион маҷқәа рыргылара – 16 млн 672 нызқь мааҭ;
Баслахә, Џьал, Мықә, Гәыԥ, Кәтол, Кындыӷ ашколқәа рҿы аремонттә усурақәа – 23 млн 112 нызқь мааҭ инареиҳаны.
Аҟәа араион аҿы:
Ачадара ақыҭан ТП №33, №53 рҿы аелектромонтажтә усурақәа – 5 млн мааҭ;
Ешыра аӡымҩангагатә ҳа акапиталтә ремонт – 2 млн мааҭ;
Ешыра астадион маҷ аргылара – 5 млн мааҭ.
Тҟәарчал араион аҿы:
Аршба имҩаҿы аҵыргәҭӡы аҟаҵара – 1 млн 500 нызқь мааҭ;
ашкол №4 аспортзал аремонт – 2 млн 500 нызқь мааҭ;
Д. Гәлиа ихьӡ зху Акультура ахан ахыб аремонт – 3 млн мааҭ;
ахәыҷқәа рыхәмарырҭақәа ҩба рыргылара – 2 млн 600 нызқь мааҭ;
Аҟармара ахәыҷыхәмарырҭа аргылара– 1млн 200 нызқь мааҭ;
Агәыбедиа ацҳа акапиталтә ремонт – 8 млн мааҭ;
Агәыбедиатәи ашкол №1 аремонт – 4 млн мааҭ.
Аԥыза-министр анапынҵа ҟаиҵеит аусурақәа аҵарашықәс ҿыц иалагаанӡа ихдыркәшарц.
