Џьапуаԥҳа еиҭалҳәеит Нанҳәазы аишәаргылара рыҩнаҭаҟны ишымҩаԥырго
Џьапуаԥҳа еиҭалҳәеит Нанҳәазы аишәаргылара рыҩнаҭаҟны ишымҩаԥырго
Анапаҵаҩра
Нанҳәа 28 аҽны Аԥсны иазгәарҭоит Нанҳәа - Анцәа иан лылацәеиқәыԥсара амш. Нанҳәа ҳажәлар рҟны ақьырсиантә ныҳәеи атрадициатә культура, атрадициатә динхаҵара еилаӡҩаны, еилаҵәаны иазгәарҭоит. Ақыҭаҟны аныҳәа рыҩнаҭаҿы ишымҩаԥырго, адунеи зыԥсаххьоу рыхьӡала аишәақәа уи аҽны ишдыргыло атәы, арадио Sputnik аефир аҟны еиҭалҳәеит Ҷлоу инхо Марина Џьапуаԥҳа.
"Еиҳараӡак сара схәыҷраахыс ишысгәалашәо ала алыԥсаа дахьыҟам аҭаацәарақәа рҿы аишәа дырхиоит, ачыс ҟарҵоит. Ашықәсан алԥсаа дахьыҟалаз идыргылаӡом. Уажәы ирацәаны аҽыԥсахрақәа ахҭнагеит аныҳәа. Исгәалашәоит санду ирхааны абрынџьқашь ҟалҵон, уажәы уи аламала избом. Исгәалашәоит, сабхәа рыцҳа аҟәардәқәа рыцԥхьаӡа ахьгылаз азааигәара днеины, аӡы каҭәаны, ампахьшьы шьҭаирсуан, рнапқәа дырбошәа. Ачыс иқәыз зегьы досу (зыдунеи зыԥсаххьаз-азгәаҭа) рсаанқәа ианҵаны иҟарҵоит, убас арыжәтәқәагьы. Анаҩс "арахь шәхьамԥшааит" ҳәа иганы икарҭәоит. Асаанқәа ирнырҵазгьы џьара иахьыцқьоу, хәыҷык аҩны иахьацәыхароу ҭыԥк ахь иганы ишьҭарҵоит. Сан аҩнаҭаҟны аишәа лыргылаӡомызт, избанзар, аҭаацәара еиҿыҵны хазы инхаз ҳакәын. Ахәыҷқәа ҳаҟан азы, акы ҳаилаҳауа ҳнымхарц акәхап, уи аҽны ачыс ҟалҵон, ҳанду лакәзар аишәа лыргылон", - лҳәеит Џьапуаԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.
