Ҳагԥҳа Ауаажәларратә палатазы: агәра зго рхыԥхьаӡара иацлоит
Ҳагԥҳа Ауаажәларратә палатазы: агәра зго рхыԥхьаӡара иацлоит
Анапаҵаҩра
Ауаажәларратә палата амаӡаныҟәгаҩ лхаҭыԥуаҩ Изольда Ҳагԥҳа арадио Sputnik аефир аҟны 2023 шықәсазы апалата аусура аихшьаала ҟалҵеит.
Ҳагԥҳа лцәажәараҿы иазгәалҭеит Ауаажәларратә палата агәра зго рхыԥхьаӡара есышықәса иаҳа иацлоит, апалата алахәцәа уи агахәара ахьырнаҭо анаҩсгьы рҭакԥхықәра иацнаҵоит ҳәа.
"Иҳаҩсыз ашықәс март 29 рзы афбатәи аилазаара аусура иалагеит, ари аамҭа иалагӡаны 41 еиԥылара мҩаԥаҳгеит еиуеиԥшым азҵаарақәа ирызкны. Ҳрылацәажәеит афымцалашара, асоциалтә ҭагылазаашьа, аекологиа, аполитикатә зҵаатәқәа. Аилибакаараз, изныкымкәа апалатахь инеит амчра знапы алакугьы, аоппозициа ахаҭарнакцәагьы. Ҳрылацәажәеит апартаментқәа, ацитрустә аамҭа иацу ауадаҩрақәа, атуризм иадҳәалоу уҳәа ирацәан азҵаарақәа. Хкомиссиақәа русура иабзоураны, еиуеиԥшым ақәҵарақәа ҳадаҳкылоит, урҭ амчрахь, аҳәынҭқарра ахада иахь, Жәлар реизарахь иҳашьҭоит. Убраҟа еснагь иаарԥшын апалата алахәцәа реиҳараҩык ргәаанагара. Ашықәс аихшьаала ҟаҳҵозар, ҳазлацәажәоз аусқәа рымҽхак акыр иҭбаан, иҟоуп иҳақәҿиазгьы, иҟоуп ҳажәалагалақәа ахшыҩзышьҭра анырмоузгьы", - лҳәеит Ҳагԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.
