Аԥсны аԥсабара аҭыԥантәи аҵиаақәа ашәарҭара иҭагылар алшоит
09:00 11.07.2024 (ирҿыцуп: 10:26 11.07.2024)
© Sputnik / Александр Вильф
/ Анапаҵаҩра
АҞӘА, ԥхынгәы 11 - Sputnik. Аԥсны аԥсабара аҭыԥантәи аҵиаақәа ашәарҭара иҭагылар алшоит азиатәи аџьҵлабыӷьдуқәа рымҽхак иаҳа-иаҳа ахьыҭбаахо аҟынтә ҳәа агәаҽанызаара ҟарҵеит Санкт-Петербургтәи аҳәынҭқарратә университет агеоботаникцәа.
Аҭҵаарақәа кьыԥхьуп Russian Journal of Biological Invasions аҟны.
Аҵарауаа игәарҭеит XIX-XX ашәышықәсақәа рзы ареспубликахь иааргаз аҵиаақәа аҳауа аҽыԥсахра иахҟьаны аҭыԥантәи аҵиаақәа анырра арҭо ишалагаз.
СПбГУ агеоботаникцәа иҭырҵааит Аԥсны ашьхараҿы аҵыхәтәантәи 20 шықәса изызҳауаз аџьҵла быӷьдуқәа.
"Ари аҵла ӡынгьы-ԥхынгьы ииаҵәоуп, 20 метра рҟынӡа иҳаракхар ауеит, иаакәыршаны аҵакыра хнаҩоит бӷьыла, егьырҭ аҵиаақәеи аҵлақәеи рзгьы ашәшьыра ҟанаҵоит. Ҳара иазгәаҳҭеит арҭ аџьҵлақәа егьырҭ ааигәатәи аҵакырақәа анырра бааԥсны ишрырҭо, уи азы апроцесс ацашьа аҭҵаара ҳалагеит. Еилкаахеит дара рымҽхак дырҭбаауа ишалагаз, аҭыԥантәи афлора ишахаԥо", — ҳәа лҳәоит аҭҵаарақәа мҩаԥызгоз Ирина Антонова, иагьазгәалҭоит егьырҭ аҵиаақәа ашәарҭара ишҭагылоу.
Ашәарҭара иҭагылоуп канадатәи ашәҭҩежьду, америкатәи ачықь "бакхарис лебедолистный".
Ишьақәгылаз ауадаҩрақәа аӡбаразы аҵарауаа аҵакыра ахылаԥшра ӷәӷәа аҭахны ирыԥхьаӡоит, иазгәарҭеит ҿыцны арахь иаарго аҵлақәа рхымҩаԥгашьагьы иацклаԥшларц.
