Курсктәи аобласт агуманитартә цхыраара аҭаразы аԥареизгара хацыркуп Аԥсны
20:48 23.09.2024 (ирҿыцуп: 23:48 23.09.2024)
© Sputnik / Илья Питалев
/ Анапаҵаҩра
АҞӘА, цәыббра 24 - Sputnik. Агәыҳалалратә фонд "Ашана" Ахәыҷқәа рзинқәа рыхьчаразы аппарати Аҭагылазаашьа ҷыдақәа рминистрреи рыдгыларала иаанартит Курсктәи араион аҿы ааха зауз агуманитартә цхыраара рыҭаразы агәыҳалалратә ԥареизгара.
Аԥсны иахьаҵанакуа афатә аалыҵқәеи ахрыцқьаратә маҭәарқәеи зҭиуа анаплакқәа рыбжьара аԥареидкылара хацыркуп. Еизгахо аԥара лассы ибжьымсуа афатә аалыҵқәа раахәара иазырхахоит.
"Ҳара иаҳгәалашәоит Аԥсны жәлар Рџьынџьтәылатә еибашьраан Нхыҵ-Кавказ ареспубликақәа, жәабала Урыстәыла арегионқәа, аҳәаанырцәтәи аԥсуа диаспора, Жәларбжьаратәи Аџьар Ҟаԥшь Аилак, иара убас егьырҭ аиуристтә усбарҭақәеи хаз игоу ахаҿқәеи агуманитартә цхыраара шаҳзааргоз. Уажәы ҳара иҳамоуп алшара ари ацхыраара зҭаху арыҭара", — ҳәа аҳәоит адырраҭараҿы.
Агуманитартә цхыраара аизгара жьҭаарамза 7 рҟынӡа имҩаԥыслоит. Ацхыраара аҟаҵашьақәа ртәы еилышәкаар шәылшоит ателеграм-канал @fondashana аҿы, мамзаргьы афонд аофициалтә саит.
