Жәабран 15 рзы Аԥсны аҳәынҭқарра ахада заанаҵтәи иалхрақәа мҩаԥысуеит
12:10 28.11.2024 (ирҿыцуп: 13:07 28.11.2024)
© Sputnik / Томас Тхайцук
Анапаҵаҩра
АҞӘА, абҵара 28 — Sputnik. Жәабран 15 рзы Аԥсны аҳәынҭқарра ахада заанаҵтәи иалхрақәа мҩаԥысуеит. Аӡбара рыдыркылеит Жәлар Реизара-Апарламент асессиа аилатәараҿы.
Апарламент адепутат Дауҭ Хәытаба иажәақәа рыла, асабша алхрақәа рзы иманшәалоуп амҽыша аасҭа, избанзар алхратә ҭыԥқәа еиҳарак иахьаадыртуа ашколқәа рҟны ауп, насгьы алхратә комиссиақәа рҿы арҵаҩцәа аус руеит.
Алхратә комиссиа хада ахантәаҩы Дмитри Маршьан Sputnik иазеиҭеиҳәеит анаҩстәи ахҭысқәа шыҿио.
Алхрақәа рымҩаԥгара ҩымз шагу, акандидатцәа рықәыргыларазы аԥшьгаратә гәыԥқәеи апартиақәеи рҭаҩра иалагоит, аҭаҩра абжьыҭара 40 мшы шагу ихыркәшахоит.
10-мш рыҩнуҵҟа Алхратә комиссиа хада адокументқәа ҭнаҵаауеит, ашәҟәҭагалара алхрақәа мызкы шрыбжьоу ихыркәшахоит.
Абри ашьҭахь, акандидат ҩнызқь напынҵамҭа инаркны ҩнызқьи бжаки рҟынӡа еизигар акәхоит. Аизара ду аҟны апартиа акандидат икандидатура ықәнаргылозар, анапынҵамҭақәа реизгара аҭахӡам.
Аҳәынҭқарра ахадеи ихаҭыԥуааи ҳәа кандидатс иқәгыло Алхратә комиссиа хадахь арзаҳал нарышьҭроуп алхрақәа рхы рылархәра ишақәшаҳаҭу азы, рҭаацәеи дареи рлагалази рмазарази адыррақәа. Иара убас, аԥсуа бызшәа шырдыруа шьақәдырӷәӷәароуп.
Актәи атур аҿы иаиааиз далкаамхар, аҩбатәи атур ҩымчыбжь рышьҭахь имҩаԥгахоит. Уи рхы аладырхәуеит еиҳаны абжьы зауз ҩыџьа акандидатцәа. Аҳәынҭқарра ахадас дҟалоит еиҳаны абжьы зауа.
Аҳәынҭқарра ахада иҭоубашьҭаҵара мҩаԥысуеит алхрақәа рылҵшәақәа анрылаҳәаха инаркны 30-мшы рыҩнуҵҟа.
