Апарламент аиҳабы Лаша Ашәба Sputnik аиубилеи рыдиныҳәалеит
19:12 02.12.2024 (ирҿыцуп: 11:05 03.12.2024)
© Sputnik / Томас Тхайцук
Анапаҵаҩра
АҞӘА, ԥхынҷкәын 2 - Sputnik. Аԥсны Жәлар Реизара — Апарламент аиҳабы Лаша Ашәба Sputnik аиубилеи рыдиныҳәалеит.
Иара иазгәеиҭеит амаҵзура зыжәҩахыр еибыҭоу аколлектив оперативла, обиективла ажәабжьқәа еиҭанаҳәоит ҳәа, Аԥсны ауаажәлар атәылаҿи адунеи аҿи имҩаԥысуа ахҭысқәа рыӡбахә ҳәо.
"Шәара пату рықәышәҵоит шәзанааҭ атрадициақәа, Аԥсны ажурналистика иамоу аԥышәа ду. Убри аан шәара адунеи зегь азы шәаартуп, активла аус рыдыжәулоит аԥеиԥш бзиа змоу апроектқәа, иахьатәи аамҭа ицәырнаго актуалтә проблемақәа рзы еиуеиԥшым агәаанагарақәа цәырыжәгоит, аҳәаанырцәтә аудиториа Аԥсны Аҳәынҭқарра закәу, уи аҭоурых, акультура дшәырдыруеит, аԥсуа бызшәа ӡырыжәгоит", — ҳәа ануп адныҳәалара атекст аҿы.
Ашәба амаҵзура аусзуҩцәа иҭабуп ҳәа реиҳәеит русеицуразы, реилибкааразы, ирзеиӷьеишьеит аԥхьаҟа аҿиара бзиа, аихьӡара ҿыцқәа.
