Агәабзиарахьчара аминистрра 2024 шықәсазы ахықәкытә программақәа 9 рынагӡара алнаршеит
15:21 26.12.2024 (ирҿыцуп: 15:22 26.12.2024)
© Sputnik / Леон Адлейба
Анапаҵаҩра
АҞӘА, ԥхынҷкәын 26 - Sputnik. Аԥсны агәабзиарахьчара аминистрра 2024 шықәсазы ахықәкытә программақәа 9 рынагӡара алнаршеит.
Агемодиализ апрограмма 50,6 миллион мааҭ азоужьын, 81-ы рхы аладырхәит.
Аимҳәаду иаҿагыло ацхыраара аиӷьтәраз — 7 миллион мааҭ.
Атәылауаа Аԥсны анҭыҵи уи аҩнуҵҟеи рыхәшәтәра — 180 миллион мааҭ. Апрограмма инақәыршәаны Урыстәылатәи ахәшәтәырҭақәа рҿы 1332-ҩык ачымазцәа аҳақьымтә цхыраара роуит, 18-ҩык аҳәса ЕКО апроцедура иахысит.
Аџьынџьтәылатә еибашьара аинвалидцәа рмедицинатә реабилитациа — 3,5 миллион мааҭ.
Арратә маҵзура аҽазыҟаҵара — 450 нызқь мааҭ.
Амедицинатә усбарҭақәа ахәшәқәа рыла реиқәыршәара — 195,8 миллион мааҭ. Агәабзиарахьчаратә усхк акадыртә еилазаара аиқәыршәараз — 18 миллион. Апрограмма аҳәаақәа ирҭагӡаны 51-ҩык астудентцәеи 38-ҩык аординаторцәеи аҵара роуит.
Агәабзиарахьчара аминистрреи Амедицина аԥгаԥсатә фонди даҽа ҩ-программак рыла аус руеит акьыбачымазара змоу ауаа рыцхыраареи, зцәазтәым аҳәсеи, ахшара дзауыз аҳәсеи ахәшәқәеи амедицинатә еиқәыршәагақәеи рыла реиқәыршәараз.
