Аԥсны Жәлар Реизара иаднакылеит ауаҩы изинқәа рыхьчаразы азинмчы змоу лаҳасабырба
14:08 13.03.2025 (ирҿыцуп: 15:24 13.03.2025)
© Sputnik / Томас Тхайцук
Анапаҵаҩра
АҞӘА, хәажәкыра 13 - Sputnik. Аԥсны Жәлар Реизара-Апарламент аҿы еицҿакны ирыдыркылеит Аԥсны ауаҩы изинқәа рыхьчаразы азинмчы змоу Анас Кьышьмариаԥҳа 2024-тәи ашықәсазы иҟалҵаз аҳасабырба.
Ихадоу:
Абахҭақәеи ахара здырҵаз ауааи ахьҭаркуа аҭыԥқәа реиҿкаашьа астандартқәа ирықәшәом. Аҩнуҵҟатәи аусқәа рминистрра иатәу аамҭалатәи аанкыларҭеи ашьаусҭҵааратә аанкыларҭеи рҿы ада, амедицинатә усзуҩы дыҟаӡам.
Аомбундсмен аусбарҭа аҳасабырба ианыԥшит азинхьчаратә усзуҩцәа ақәымчреи аргәаҟреи рхы рархәара аԥырҟәҟәаареи уи аҿагылара арӷәӷәареи рзы абжьгарақәа.
2024 шықәсазгьы анхаразы азинқәа рыҭара аамҭа арххара иадҳәаланы адыррақәа ыҟан. Азин аҭараан еиԥш уи аҿҳәара ацҵараангьы.
Аԥсны Адәныҟатәи аусқәа рминистрреи, Аиустициа аминистрреи, Апрокуратура хадеи, ҿыц иалху Аԥсны ахадеи рахь аомбудсмен ааԥхьара ҟалҵеит, Урыстәыла аҳәынҭқарратә усбарҭақәа ареспублика атәылауаа рганахь ала ирыдыркылаз аӡбарақәа инарыдҳәаланы ирыдыркылази иазԥхьагәарҭази аусмҩаԥгатәқәа ртәы ауаажәларра иддырдырырц. Зыӡбахә ҳәоу Леуан Миқааи Кан Кәарҷиеи Урыстәыла тәылауаҩра рымхра, Аԥсны атәылауаҩ Барас Кәыџба Урыстәыла аҵакырашҟа аҭалара иақәиҭымтәра, Урыстәыла Аусҭҵааратә еилакы Аԥсны атәылауаа рганахьала ашьауӷатә ус аахацыркра, ажурналист Инал Ҳашыг иноагентуп ҳәа иазхаҵара роуп.
2024 шықәса ԥхынҷкәынмзазы Ареспубликатә хәыҷтәы хәшәтәырҭа иҭаз ачымазаҩ дыԥсит. Апрокуратура имҩаԥнагоит апроцессуалтә ҭҵаара, дызхәшәтәуаз аҳақьыми аҟәша аиҳаби рганахь ала. Аомбудсмен ауаажәларра рахь ааԥхьара ҟалҵеит аусеилыргара официалла алҵшәақәа рылаҳәахаанӡа ирццаку алкаақәеи аусқәеи рыҟаҵара рҽырцәырыхьчаларц.
