Гәдоуҭатәи амузеи аҿы Марттәи ажәылара иазку ацәыргақәҵа "Ахьаа" аатит
13:00 16.03.2025 (ирҿыцуп: 15:59 16.03.2025)
© Sputnik
Анапаҵаҩра
АҞӘА, хәажәкыра 16 - Sputnik. Аԥсны жәлар Рџьынџьтәылатә еибашьра Гәдоуҭатәи амузеи аҿы Марттәи ажәылара иазку ацәыргақәҵа "Ахьаа" аатит.
Ацәыргақәҵаҿы иаарԥшуп аоперациаҿы иҭахаз аруаа 222-а рфотосахьақәа, насгьы 1994 шықәса абҵарамзазы иҭахаз рыԥсыбаҩ аҵхра иалахәыз анацәа рфотосахьақәа. Аҭыхымҭақәа афотоҭыхҩы Витали Қьецба итәуп.
"Абарҭ асахьақәа рылацәажәара даара иуадаҩуп, избан акәзар урҭ зегьы аԥсуа жәлар ирхыргаз ахьаа ала иҭәуп. Марттәи ажәылараҿы иҭахаз, урҭ ранацәа рҭоурыхқәа, рыцҳарас иҟалаз, иахьа уажәраанӡа инагӡаны иҭҵаам", - ҳәа азгәалҭеит амузеи адиректор Гәыгәыца Џьыкырҧҳа. Афырхацәа рҭоурыхқәа аринахысгьы рыҭҵаара хымԥадатәиуп, урҭ ҳхаҳмыршҭыроуп ҳәа инаҵшьны иазгәалҭеит Џьыкырҧҳа.
1993 шықәса хәажәкырамзазы Аҟәа агаразы имҩаԥысуаз ажәылараан аԥсуа аруаа 222-а ҭахеит, 23-ҩык хабарда ибжьаӡит.
