Аҟәа 2509 шықәса ахыҵра аҳаҭыраз имҩаԥгахоит аусмҩаԥгатәқәа жәпакы
10:17 05.07.2025 (ирҿыцуп: 10:31 05.07.2025)
© Sputnik / Томас Тхайцук
Анапаҵаҩра
АҞӘА, ԥхынгәы 5 - Sputnik. Иахьа Аҟәа 2509 шықәса ахыҵра азгәарҭоит.
Ажәтәӡатәи ажәабжьқәа изларҳәо ала, Амшын еиқәа аԥшаҳәаҿы иҟоу ақалақь ашьаҭа ркит аргонавтцәа, аишьцәа-диоскураа Кастори Полидевки, дара ахьтәы уасцәа аԥшаара ашьҭахь рыҩныҟа ахынҳәра рҭахымхеит.
Уи аахыс Аԥсны аҳҭнықалақь аҭоурыхтә хҭысқәа рацәаны иахнагеит, аурымқәа, генуезиа, османтәи, аурыстәи аимпериақәа, Асовет Еидгыла рнапаҵаҟа иҟан.
1993 шықәсазы цәыббра 27 рзы Аҟәа ахақәиҭтәра Аԥсны жәлар Рџьынџьтәылатә еибашьра аҵыхәԥҵәаран иҟалеит.
Иахьа аҳҭнықалақь аҿы имҩаԥгахоит аусмҩаԥгатәқәа рацәаны:
асааҭ 10:00 – 20:00 рзы — Тарас Шамба ихьӡ зху апарк аҿы Аҟәа аҵара аусбарҭа имҩаԥнаго ахәыҷқәа рзы арлахҿыхратә программа,
асааҭ 12:00 – 18:00 рзы — Сергеи Багаԥшь ихьӡ зху ашҭаҿы аԥсуа чысхкқәеи аҳәаанырцә чысхкқәеи ргастрофестиваль, ахәмаррақәа, аицлабрақәа,
асааҭ 16:00 рзы — ахыци ахәымпали, ашахматқәа, ашашкақәа рзы аицлабрақәа,
асааҭ 18:00 рзы — Аҟәа агәашьаркыраҿы Самаратәи адоуҳатә оркестр аконцерт,
асааҭ 20:00 рзы — аныҳәатә концерт "Сара с-Аҟәа",
асааҭ 22:00 рзы — аныҳәатә салиут.
