Кириенко иҳәеит Урыстәылеи Аԥсни русеицураҿы аҵарадырра ихадоу ахырхарҭақәа ишреиуоу
19:20 11.07.2025 (ирҿыцуп: 21:41 11.07.2025)
© Sputnik / Пелагия Тихонова
/ Анапаҵаҩра
АҞӘА, ԥхынгәы 11 - Sputnik. Аҵарадырра – Урыстәылеи Аԥсни русеицураҿы ихадоу ахырхарҭақәа иреиуоуп ҳәа инаҵшьны иазгәеиҭеит Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко.
Иара иажәақәа рыла, Урыстәылатәи ахада Владимир Путин 54 миллион мааҭ азоуижьит Аԥсны аурыс бызшәа арҵаҩцәа есымза хәба-хәба нызқь мааҭ руалафахәы иацҵаны ироуларц азы.
Абри аҩыза аӡбамҭа идикылеит Аԥсны ахада Бадра Гәынбагьы – аԥсуа бызшәа арҵаҩцәагьы аԥарацҵақәа роулоит.
Уи адагьы, Урыстәыла ареспубликаҿы апроект "Ахәыҷра анавигаторцәа" аиҿкааразы аԥара азоунажьит.
"Ари иаанаго ашколқәа зегьы рҿы, маҭәарк дзырҵо иакәымкәа, ааӡаразы аҭакԥхықәра зду аӡә дҟалоит. Еилкаауп, Аԥсны иара ахатәы ааӡаратә программа шыҟало, уи атрадициақәа, акультура, иааидкыланы аԥсуара инақәыршәаны ишышьақәгылахо, ажәакала, иааидкыланы иуҳәозар, ари аԥшьгамҭа даара ииашоуп", — ҳәа азгәеиҭеит Кириенко.
Есымза ас еиԥш иҟоу ааӡаҩ 40 нызқь мааҭ аԥарацҵа иоуеит.
Кириенко иара убасгьы иҳәеит, иааиуа ашықәс азы Аԥснынтәи 400-ҩык ашколхәыҷқәеи, 200-ҩык аколлеџьқәа рыстудентцәеи, 100-ҩык арҵаҩцәеи "Сириус" рзанааҭдыррақәа рыҩаӡара аизырҳаразы акурсқәа ишырхысо.
Азыҳәақәа аицлабрала рыдкылара иалагеит. Раԥхьатәи 40-ҩык "Сириус" ишьҭхоит цәыббрамзазы.
