Аҩбатәи акласс азы "Аԥсуа аԥхьара" еиҭарҿыцны Аҟәатәи актәи ашкол аҿы иԥыршәоит сынтәа
16:50 31.08.2025 (ирҿыцуп: 20:19 31.08.2025)
CC0 / /
Анапаҵаҩра
АҞӘА, нанҳәа 31 - Sputnik. Аҩбатәи акласс азы "Аԥсуа аԥхьара" иазку арҵагашәҟәы иахьатәи аҵаҩы изааигәоу аметодика инақәыршәаны аԥсахрақәа алагаланы ҳазҭалаз аҵарашықәс азы иԥышәахоит Аҟәатәи актәи абжьаратә школ аҿы. Абри атәы лҳәеит Аԥсны аҵара аминистр Хана Гәынԥҳа Аԥсуа телехәаԥшра аинтервиу аналҭоз.
"Уи иаҵанакӡом ҳара иҳармариоит ҳәа. Уи иаҵанакуеит ҳара адаптациа азаҳуеит ҳәа. Иҟоуп иалгаз ажәабжьқәа, иҟоуп ҿыц иалагалаз. Убри аҟынтәи сынтәа актәи ашкол ала иахыжьны, арҵаҩцәа, знапы иакыз арҵагашәҟәы, аҵарашықәс анҵәамҭазы ргәаанагара еилкааны, иҳақәҿиеит ҳәа иазаҳаӡбозар, ҽааны ашколқәа зегьы ирхьаҳагӡоит", — ҳәа иазгәалҭеит лара.
Аҵара аминистрраҿы агәҭакы рымоуп аҩбатәи, ахԥатәи, аԥшьбатәи аклассқәа рзы "Аԥсуа аԥхьара" арҵагашәҟәы линеикак аҳасабала еишьҭагылашьала напык иҵыҵыртә еиԥш реиҭахәаԥшра. Гәынԥҳа иара убас адырра ҟалҵеит 3 нызқь рҟынӡа Аԥсны иҭрыжьуа ашәҟәқәа сынтәа ашколқәа ишрызшаз.
