Путин Урыстәыла Ашәарҭадаратә хеилак алахәылацәа украинатәи аимак азы драцәажәеит
21:28 21.11.2025 (ирҿыцуп: 22:27 21.11.2025)
© Sputnik / Александр Казаков/POOL
Анапаҵаҩра
АҞӘА, абҵара 21 - Sputnik. Путин Урыстәыла Ашәарҭадаратә хеилак алахәылацәа алархәны украинатәи аимак азы "Трамп аҭынчразы иплан" далацәажәеит.
Ихадоу аҳәамҭақәа:
Трамп аҭынчразы иплан Алиаскатәи аиԥылара аԥхьа иалацәажәахьан, Еиду Америкатәи аштатқәа Урыстәыла акомпромисс ҟанаҵарц иаҳәеит, иаргьы уи иақәшаҳаҭхеит.
Аиԥылараҿы Путин ишьақәирӷәӷәеит, ауадаҩрақәа шыҟоугьы, Урыстәыла "иззаҳәо аҽынкылара маҷк аарԥшра" ишазыхиоу, уи азы иара иадгылоу аиҩызаратә ҳәынҭқаррақәа адырра шрырҭаз.
Урыстәыла-америкатәи аиҿцәажәарақәа рышьҭахь украинатәи аган мап ахьакыз иахҟьаны аамҭалатәи аҿымҭра шьақәгыланы иҟоуп.
Уи иахҟьаны Москва анапаҿы иҟоу аплан ирҿыцу аверсиа ацәырҵрахь икылнагеит, аха уи атекст ҷыдала иалацәажәамызт.
Украинеи уи мраҭашәаратәи аидгылаҩцәеи Урыстәыла иаиааир рылшоит ҳәа агәра ргоит, аха аибашьраҿы иҟоу аҭагылазаашьа иазкны обиективтә информациак рымам, иаҳҳәап, Купианск иҟоугьы рыздыруам.
Киев аҭынчратә ажәалагалақәа рылацәажәара мап ацәнакыр, Купианск имҩаԥысыз ахҭысқәа афронт егьырҭ ахырхарҭақәа рҿгьы иҟалоит.
"Иааизакны иуҳәозар, ҳара ари ҳазыразуп, избан акәзар Арратә операциа ҷыда бџьарла инанагӡар иалшо ахықәкахьы ҳнанагоит. Аха, изныкымкәа ишаҳҳәахьоу еиԥш, ҳара аҭынчратә еицәажәарақәагьы ҳрызхиоуп. Аха ус ианыҟала, иҳадыргало аплан хәыц-хәыц иҭаҳҵаароуп. Ҳара уи ҳазхиоуп", — ҳәа иажәа еихишьаалеит Урыстәыла ахада.
