Аспектакль "Аешелон" апрессазы аԥхьарбара мҩаԥысит Аԥсуа драматә театр аҿы
23:17 22.11.2025 (ирҿыцуп: 00:30 23.11.2025)
© Sputnik / Томас Тхайцук
Анапаҵаҩра
АҞӘА, абҵара 22 - Sputnik. Аспектакль "Аешелон" апрессазы аԥхьарбара мҩаԥысит Аԥсуа ҳәынҭқарратә драматә театр аҿы асабша, абҵарамза 22 рзы.
Михаил Рошьин ипиесала иқәыргылоу ари аспектакль Урыстәылатәи акультуратә Фонд ацхыраарала иаԥҵан, уи Аџьынџьтәылатә еибашьра Дуӡӡаҿы Аиааира агара 80 шықәса ахыҵра иазкуп.
Ақәыргыламҭа арежиссиор — Мадина Аргәын. Лара ишылҳәаз ала, "Аешелон" егьырҭ дзыԥхьахьаз апиесақәа раасҭа илнырит. Уи ауаҩи аибашьреи реиҿагылара ауп изызку. Аспектакль ала ахәаԥшцәа идлырбар лҭаххеит аибашьра аҭагылазаашьаҿы ауаҩы ихаҿсахьа ицәмыӡыр шакәу.
Ахҭыс мҩаԥысуеит ҭыԥк аҿы — адәыӷба авагон аҿы, уа зынӡа еиԥшым ауаа машәыршәа еиқәшәоит. Аперсонажцәа ирхырго ахҭыс уадаҩқәа изларылшо ала ирышьцылар акәхоит.
"Апиеса даара угәаҵанӡа инеиуеит. Аешелон аҿы аибашьра хлымӡаах еизнагаз, аџьамыӷәақәа рыхганы — аӡҟы дызмоу уа иҟоуп, абыргцәа, аԥсыҭбара, ачымазара, Аиааира шаҳго ҳдыруеит ҳәа агәыӷра мырӡӡакәа. Аҵыхәтәаны ахәыҷы диуеит, уи аԥсҭазаара ԥхьаҟа ацара иасимволны иҟалеит", — ҳәа азгәалҭеит Нина лроль назыгӡо Аԥсуа театр актриса Кама Инаԥшьԥҳа.
Аспектакль "Аешелон" аԥхьарбара мҩаԥысуеит Аԥсуа драматә театр аҿы абҵарамза 24-25 рзы.
