ҲАЛАЛРАЛА ИҞАНДАЗ…
Аҭара ақыҭан Быҭәы Тариал иԥсхәы руан. Абрахь иааз абыргцәа ашҭаҿы ашәшьыра иҵатәаны ажәытә жәабжьқәа рҳәон.
– Иҳалалу анцәагьы дибоит, аԥсынҵры дугьы ииҭоит, – иҳәеит ақыҭа папы Кәасҭа-Жакьаҵаӷа. Уи ус хьыӡшьарас иара иахьимаҳауаз изырҳәон, ижакьа ахьыҵаӷаз азы. Кәасҭа иҭахын, иара дышпапу еиԥш, абра итәаз акыр збахьаз, акыр заҳахьаз ауаа зырҟәышшаз, иџьыршьашаз ахшыҩ зҵаз акы иҳәар.
Кәасҭа ииҳәаз абра иҟаз Чаҵә Чагә иаҳаит. Уи идыруан Кәасҭа зынӡагьы дшыҳалалмыз, дшыгызмалыз, дышкаҷбеиз, амцҳәарагьы шидыруаз.
– Иуҳәаз сақәшаҳаҭуп, Кәасҭа, аха, – иҳәеит Чагә, – ҳалалрала иҟандаз, ас ду аан цәгьара ҟазымҵаӡо, иҟәбаҟәшәо адәы иқәыз ҳардәына ҳалалқәа зегьы ԥсит, ҳамхқәа зегьы еимызыҵәҵәоз ахьажь гызмалқәа акгьы рмыхьӡеит, абри зыхҟьазеи?
Заур Быҭәба ишәҟәы "Чаҵә Чагә ихҭысқәа" аҟынтә
