Ауаажәларратә палата VI ааԥхьара аихшьаалатә еилатәара мҩаԥысит Аҟәа.
Ауаажәларратә палата VI ааԥхьара аихшьаалатә еилатәара мҩаԥысит Аҟәа.
АП амаӡаныҟәгаҩ Гули Кьычԥҳа лколлегацәа русуразы ҭабуп ҳәа ралҳәеит ҳәа аанацҳауеит "Аԥсныпресс".
"VI ааԥхьара уамашәа ахҟьаԥҟьа аиуит: араҟа имаҷымкәа хра злаз азҵаарақәа шьҭыхын. Ҳара аемоциа змоу уаауп, зны- зынла абарҭ аҭӡамцқәа рыҩнуҵҟа аполитикатә ҭыӡшәақәа ирылацәажәон, идырҭынчуан", — азгәалҭеит лара.
Иара убас Кьычԥҳа иазгәалҭеит хәажәкыра 12 рзы имҩаԥысыз Аграждантә форум аҵак ду шамоу. Лара лгәаанагарала Ауаажәларратә палата иалшеит афорум аҿы ишьҭыхыз азҵаарақәа рҵакы ауаажәларра рҟынӡа анагара.
"Ауаажәларратә палата еснагь атәыла анапхгара иргәаланаршәоит атәылауаа иааиԥмырҟьаӡакәа рыҿцәажәара шаҭаху. Абас мацара ҳҿаԥхьа иқәгылоу ауснагӡатәқәа рыӡбара алшоит", — лҳәеит лара.
Ауаажәларратә палата Аԥсны ахада Бадра Гәынба, Жәлар Реизара адепутатцәа, Ауаажәларратә палата амаӡаныҟәгаҩ Гәыли Кьычԥҳа, иара убас АП алахәылацәа Сократ Џьынџьал, Давид Ԥлиа, Лиудмила Лолуаԥҳа, аппарат аусзуҩцәа аџьшьаратә шәҟәқәа рзынанашьҭит. Иара убас аџьшьара шәҟәқәа рыҭан апалата аусура аазырԥшуаз Амассатә информациа ахархәагақәа рхаҭарнакцәа.
