Аспектакль "Мариа Стиуарт" аԥхьарбара мҩаԥысуеит Аԥсуа театр аҿы
14:36 19.05.2026 (ирҿыцуп: 17:00 19.05.2026)
© Sputnik
Анапаҵаҩра
АҞӘА, лаҵара 19 — Sputnik. Фридрих Шиллер ипиесала иқәыргылоу аспектакль "Мариа Стиуарт" аԥхьарбара мҩаԥысуеит Аԥсуа театр аҿы лаҵара 26-27 рзы.
Ақәыргыламҭа арежиссиор — Аԥсны зҽаԥсазтәыз артистка Мадина Аргәынԥҳа. Лара лажәақәа рыла, дарбанызаалак арежиссиор иеиԥш аспектакльқәа рзы аматериал еизылгоит, иааиуа хәышықәса рзы аус здылуло апиесақәа рсиа еидкыланы илымоуп.
"Санстудентыз инаркны "Мариа Стиуарт" алкааны исыман. Иааит аамҭа Аԥсуа театри сареи уи аус адулара ҳаназыхиоу", — ҳәа азгәалҭеит Аргәынԥҳа.
Адунеи аҿы аҳәса рпиесақәа маҷуп, убри аҟнытә, ари аматериал аҭҵаара даара аинтерес аҵоуп ҳәа азгәалҭеит арежиссиор.
Ақәыргыламҭа арежиссиор — Аԥсны зҽаԥсазтәыз артистка Мадина Аргәынԥҳа. Лара лажәақәа рыла, дарбанызаалак арежиссиор иеиԥш аспектакльқәа рзы аматериал еизылгоит, иааиуа хәышықәса рзы аус здылуло апиесақәа рсиа еидкыланы илымоуп.
"Санстудентыз инаркны "Мариа Стиуарт" алкааны исыман. Иааит аамҭа Аԥсуа театри сареи уи аус адулара ҳаназыхиоу", — ҳәа азгәалҭеит Аргәынԥҳа.
Адунеи аҿы аҳәса рпиесақәа маҷуп, убри аҟнытә, ари аматериал аҭҵаара даара аинтерес аҵоуп ҳәа азгәалҭеит арежиссиор.
"Ари акатегориа иаҵанакуа аспектакльқәа рацәаны исымоуп, урҭ иреиуоуп — "Бернарда Альба лыҩны", "Аешелон". Аԥсуа театр аҿы ахацәа ргәыԥ шыӷәӷәоу еиԥш, аҳәса ртруппа акала урҭ ирыҵахом, ихәмарша ыҟоуп. Аинтерес аҵоуп афырхаҵара ахацәа рыла акәымкәа, аҳәса рхаҿрала аарԥшра", — лҳәеит лара.
Апиеса аҟазаратә интерес — ззинқәа еиҟароу ҩ-хаҭарак реиҿаргылара: адунеи зегьы аҿы еицырдыруа аҳәса – Англиа аҳкәажә Елизаветеи ауадаҩрақәа ирыхҟьаны Англиа аҳра зауз Шотландиа аҳкәажә Мариа Стиуарти ҳәа инаҵшьны иазгәалҭеит Аргәынԥҳа.
"Уи аполитикцәагьы, ҩ — динхаҵаракгьы — апротестантреи акатолицизми, арҿиаратә гәыԥқәеи, аколлективқәеи реиҟәыҭхареи реиҿагылареи роуп. Ари аспектакль урҭ азҵаарақәа рҭак ҟанаҵаӡом, ауаажәларра реиҟәшара амзыз хадақәа реиҭаҳәареи рыҭҵаареи зыхҟьо азы азҵаарақәа ықәнаргылоит", — лҳәоит лара.
Аргәынԥҳа иазгәалҭеит, "Мариа Стиуарт" ауаҩы ахақәиҭрахь имоу агәазыҳәара, иҩнуҵҟатәи идоуҳа ахақәиҭра иазкуп ҳәа.
Ақәыргыламҭа иалоуп фҩык актиорцәа — Аԥсны зҽаԥсазтәыз артистка Ира Коӷониаԥҳа, Елеонора Коӷониаԥҳа, Аԥсни Аахыҵ Уаԥстәылеи зҽаԥсазтәыз артистка Хьыбла Мықәԥҳа, Кристина Цымцԥҳа, Саид Кокосқьериа, Алхас Ферзба.
