Стенин ихьӡ зху XII жәларбжьаратәи афотоконкурс аҿы аиааира згаз рыхьыӡқәа рылаҳәоуп
© Foto / Muhammad Amdad Hossain/Stenincontest
Анапаҵаҩра
Нанҳәамза 6, 2014 шықәса рзы "Урыстәыла иахьа" афотокорреспондент Андреи Стенин аредакциатә дҵахь данцоз автомашьына Донецк амҵан украинатәи аруаа иеихсит.
АҞӘА, жьҭаара 21 - Sputnik. Андреи Стенин ихьӡ зху XII жәларбжьаратәи афотоконкурс аҿы аиааира згаз рыхьыӡқәа рылаҳәеит Москва.
Гран-при иоуит ливантәи афотоҭыхыҩ Абдул Кадер Аль-Баи афотосахьақәа рсериа "Ливан, 2024-2025: авиаахақәа рыбжьара аԥсҭазаара" азы.
"2024 шықәса цәыббрамзазы Ливан арратә еимакы ӷәӷәа иаларгалеит. Атәыла зегьы Израиль аҳаиртә жәыларақәа ирыҵанакит. Аӡәырҩы рынхарҭа аанрыжьыр акәхеит. Арҭ афотоқәа ҭыхуп Ливан еиуеиԥшым арегионқәа рҿы. Урҭ ирныԥшуеит ааха ашьҭахь раԥхьатәи ашәымҭақәеи аиқәырхаратә операциақәеи раан иҟаз шыҟаз. Афотосахьақәа иаҳдырбоит иаабац ауаа аибашьреи ироуа ацәыӡқәеи шырхырго, ахеиқәхара рыҽшазыршәо", - иҳәеит аиааиҩы ихаҭа.
Гран-при занашьоу инаиваргыланы абарҭ аноминациақәа рҿы аиааира згаз рылаҳәан:
Аноминациа "Ажәабжь хадақәа. Афотосахьақәа рсериа" аҟны актәи аԥхьахә аиуит Бангладештәи афотоҟаза Аль Музтаб Росул иусумҭа "Ахыб — ажәҩан, аццышә иалху адашьма".
Аноминациа "Ажәабжь хадақәа. Афотосахьақәа рсериа" аҿы иреиӷьуп ҳәа ишьоуп урыстәылатәи афотоҭыхыҩ Сергеи Бобылев исериа "Аибашьра аныҩбжьы".
Аноминациа "Аспорт. Афотосахьа заҵә" аҟны аиааира агеит урыстәылатәи афотоҭыхыҩ Евгени Филиппов иусумҭа "Аҵыхәтәантәи афаза".
Ацлабра алахәылацәа рыбжьара зегь реиҳа иалыркаауа аноминациа — "Сара сыпланета" аҟны актәи аҭыԥ агеит бангладештәи Солеиман Хоссеин иҭыхымҭа "Аԥслымӡ цәаҳәаҿы аԥсҭазаара".
Иарбоу аноминациаҿы иреиӷьу афотосахьақәа рсериа ҳәа ишьоуп урыстәылатәи автор Алиса Севернаиа лсериа "Ҳара ара ҳанхоит".
Аноминациа "Апатреҭ. Ҳаамҭа афырхаҵа" аԥхьахәтә ҭыԥқәа ааныркылеит Индиеи Урыстәылеи рҟынтәи афотожурналистцәа русумҭақәа.
"Агәыӷра алаԥш" — абас ахьӡуп индиантәи Арпан Басу Чаудхури иҭыхымҭа. Аҩбатәи аусумҭа–урыстәылатәи афотожурналистка Мариа Семионова "Алашьцараҿы агәӷрақәаа" рсериа ауп.
Аноминациа "Хыхьынтәи абара. Афотосахьа заҵә". Ажиури аԥхьахә аиуит бангладештәи Муҳаммад Амдад Хоссеин иҭыхымҭа "Аӡиас аԥшаҳәаҿы ахәашатәи аныҳәара".
Аноминациа ҷыда "Аԥсҭазаара амчхара" аҿы ажиури актәи аҭыԥ ианаршьеит Павел Волков – аибашьра ашьҭахь зықалақьқәа рҿы анхараз иаанхаз, згәыӷра змырӡуа ауаа ирызку аҭыхымҭақәа рсериа "Ареквием " азы.
Москва имҩаԥысуаз ацеремониа аицлабра алауреатцәа русумҭақәа рцәыргақәҵатә турне хацнаркит. Москва аицлабраҿы аиааира згаз русумҭақәа абҵара 10 рҟынӡа иубар алшоит Москва Амузеи аҿы.
