АҞӘА, мшаԥы 1 - Sputnik, Сари Кәарцхьиаԥҳа. 3:1 ҳәа "Гагра" аҟәатәи "Нарҭ" иаиааит ашьапылампыл азы Аԥсны ачемпионат аҿы ҳәа еиҭеиҳәеит ҳтәыла ашьапылампылтә лига адиректор Витали Федоренко.
"Гагра" ахәмарыҩцәа аҩбатәи аминуҭ азы ирылдыршеит актәи ампыл амба аҭаршәра. Уи ҭаиршәит Рамин Барцыц. Абас ирласны ирыцәҭашәаз ампыл "Нарҭ" ахәмарыҩцәа ршьара иқәнаҟьеит.
"27-тәи аминуҭ азы "Гагра" ашьапылампыласыҩ Асҭамыр Сангәлиа аҩбатәи ампыл ҭаиршәит", - еиҭеиҳәоит Федоренко.
28-тәи аминуҭ азы "Нарҭ" ахәмарыҩ Ҭемыр Агрба илиршеит аҭактә мпыл амба аҭаршәра, аха аҩбатәи атаим алагамҭаз Георги Дгебуаӡе иҭаиршәыз ахԥатәи ампыл "Нарҭаа" ргәыӷрақәа архәашеит.
"Гагра" иалшон еиҭахгьы ампылқәа рҭаршәра. Акы, аҩны ихәмаруан, ҩбагьы - "Нарҭ" ахьчаҩ Анри Ҳагба ахәмарра азин имхын", - еиҭеиҳәоит Федоренко.
Ишаҵахазгьы, "Нарҭ" 24 очко аманы атаблицаҿ актәи аҭыԥ ааннакылоит.