АҞӘА, жьҭаара 6 - Sputnik. Аԥсны, Урыстәыла, Шьамтәыла Адәныҟатәи аусқәа рминистррақәа рыҩаӡарала аилацәажәарақәа рмеханизм аԥырҵоит ҳәа иҳәеит Аԥсны Адәныҟатәи аусқәа рминистр Инал Арӡынба.
"Ари амеханизм ахәаахәҭра-економикатәи агуманитартә проетқәа рынагӡареи иазырхоуп. Ари Сергеи Лавров дызқәышаҳаҭхаз Аԥсны, Шьамтәыла Адәныҟатәи аусқәа рминистррақәа реицаԥшьгамҭоуп. Аԥхьаҟагьы ари ахырхарҭа ҳарҿиалоит", - ҳәа иҳәеит аминистр.
Аԥсны Адәныҟатәи аусқәа рминистр Инал Арӡынба Москва даҭаан дыҟоуп.
Аԥсни Шьамтәылеи наҟ-ааҟ ишеизхеибаҵази адипломатиатә еизыҟазаашьақәа шрыбжьарҵази рзы аҳәамҭа ҟарҵеит лаҵара 29, 2018 шықәсазы.
2020 шықәса ԥхынгәымза анҵәамҭазы Шьамтәылатәи Арабтә республика ахада Башар аль-Асад дидикылеит Аԥсны Аҳәынҭқарра азинмчра нагӡа змоу ацҳаражәҳәаҩ Баграт Хәытаба. Имҩаԥган аҳәынҭқарратә гәраргагатә шәҟәқәа реимдара.