АҞӘА, абҵара 19 - Sputnik, Сариа Кәарцхьиаԥҳа. Аҽыбӷаҟазаразы Аԥсны ачемпионат мҩаԥысит Бзыԥтәи аҽырҩырҭаҿы, абри атәы Sputnik акорреспондент илзеиҭеиҳәеит Аҽыбӷаҟазаратә спорт афедерациа аӡбаҩ хада Џьарназ Бениа.
Аицлабрақәа ԥшь-хырхарҭак рыла иҟан - аҵәеигәыдҵа, аҽылампыл, аҽырыҩра, аҽырхәмаррақәа.
Аҵәеигәыдҵа иалахәын Лыхни Гагреи ркомандақәа. Гаграа 14:7 ҳәа лхаа ириааит, иагьроуит 45 нызқь мааҭ ҳамҭас. Лхаа аҩбатәи аҭыԥ азы 30 нызқь мааҭ рырҭеит.
Аҽылампыл аҿы 14:6 ҳәа ҩаԥхьа гаграа лхаа ириааит. Араҟагьы аиааира згаз 45 нызқь мааҭ роуит, аҩбатәи аҭыԥ згаз - 30 нызқь мааҭ.
Аҽырхәмарраҿы иалыркааит Мераб Аргәыни Феликс Арсиеи.
1400 метра иҟаз абжьаӡараҿы актәи аҭыԥ агеит аҽыуаҩ Дырмит Қардиа иҽыҩ, аҩбатәи аҭыԥ - аҽыуаҩ Џьубеи Аҩӡба иҽыҩ, ахԥатәи аҭыԥ - лыхнытәи аҽыуаҩ Иури Озган иҽыҩ.
1600 метра иҟаз абжьаӡараҿы актәи аҭыԥ агеит Џьубеи Аҩӡба иҽыҩ, аҩбатәии ахԥатәии аҭыԥқәа - пицундатәи аҽыуаҩ Беслан Барганџьиа иҽыҩқәа.
2000 метра иҟаз абжьаӡараҿы ахԥатәи аҭыԥ агеит Миллер Шәлымба иҽыҩ, аҩбатәи аҭыԥ - Џьубеи Аҩӡба иҽыҩ, актәи аҭыԥ - Миллер Шәлымба иҽыҩ.
2000 метра иҟаз абжьаӡараҿы жәларбжьаратәи акласс аспорт азҟаза Харлам Симониа иҳамҭазы аиԥхныҩлараан актәи аҭыԥ агеит Џьубеи Аҩӡба иҽыҩ, аҩбатәи - Алхас Лакоба иҽыҩ, ахԥатәи - лыхнытәи Анри Лакәиа иҽыҩ.
Аиааира згақәаз ироуит 60 нызқь мааҭ иҟаз аԥаратәҳамҭақәа, аҩбатәи аҭыԥқәа зга - 40 нызқь мааҭ, ахԥатәи - 25 нызқь мааҭ.