АҞӘА, абҵара 12 - Sputnik, Бадри Есиава. Есышықәса имҩаԥысуа аҽаҩраныҳәа алагеит аҭоурыхтә ҭыԥ Лыхнашҭа амҽыша, абҵара 12 рзы ҳәа ааицҳауеит Sputnik акорреспондент.
Ақыҭанхамҩаз Гәдоуҭа араион ахада ихаҭыԥуаҩ Иура Кәарацхьелиа иажәақәа рыла, сынтәа аныҳәа иалахәуп араион 20-қыҭеи, Афон ҽыц ақалақьи рнаҩс Ҟарачы -Черкесскынтәи абазақәа рхаҭарнакцәа. Иара убас, иара ахатәы ашҭа аанартит Сергеи Дбар ихьӡ зху Аԥсны Аџьынџьтәылатә еибашьра амузеи.
"Ҳара ҳахиоуп, асасцәа ҳрызԥшуп. Апрограммаҿ иара убасгьы иарбоуп аныҳәатә концерт. Ақыҭақәа рхатә аалыҵ, рнапкымҭақәа цәырыргоит, ари гәахәара дууп шаҟа ирԥшӡаны еиҿыркааз. Аныҳәахь ааԥхьара рымоуп ҳтәыла анапхгара зегьы. Ҳара гәахәарыла иҳадаҳкылоит ҳныҳәа иаҭаауа зегьы", - иҳәеит иара.
Аҭоурыхтә ҭыԥ Лыхнашҭа аҿы аҽаҩра аныҳәа есышықәса ҽаҩраҭагалан имҩаԥыргоит, акоронавирустә пандемиа аныҟаз ада. Ари араион азы иныҳәа дууп. Аныҳәахь Афон ҿыци Гәдоуҭа араион ақыҭақәеи иӡырыргоит рхатәы аалыҵ, рҽаҩра, инаргоит рнапкымҭақәа, еиҿыркаауеит ацәыргақәҵақәа.
Ари амш азы асценахь ицәырҵуеит акәашаратәи авокалтәи аколлективқәа. Иара убасгьы аԥсуа естрада ашәаҳәаҩцәа. Изҭаху ирылшоит рхы аадырԥшырц еиуеиԥшым аиндаҭларақәа рҿы.