АҞӘА, нанҳәа 17 — Sputnik, Рада Ажьиԥҳа. Аԥсны Ахада Рауль Ҳаџьымба алаҳәара ҟаиҵеит ԥхынгәы 2 2016 шықәса рзы ирӡаз, "Иаку Аԥсны" аполитикатә хеилак амаӡаныҟәгаҩ Ирина Дочиаԥҳа дахьыҟоу азы аинформациа иаша ҟазҵо миллион мааҭ аԥара ширҭо ала. Абри атәы ҳзааицҳаит атәыла Ахада Иусбарҭа анапхгаҩы инапынҵақәа назыгӡо Дмитри Шамба.
Абри аус аганахьала Аҟәа ақалақь апрокуратура ашьаус хацнаркти. Иаԥҵоуп ашьҭазара-оперативтә гәыԥ.
Аус ацашьа хаҭала хылаԥшра аиҭоит Рауль Ҳаџьымба. Аинформациа ҟазҵо ихаҭара маӡаркхоит.
