АҞӘА, ԥхынгәы 18 — Sputnik. Рауль Ҳаџьымба Аусԥҟа инапы аҵеиҩит Беслан Дбар Аԥсадгьыл ахь ахынҳәразы Аилак аиҳабыс дҟаҵазарц. Абри атәы аанацҳауеит атәыла Ахада иофициалтә саит.
Аусҧҟа атекст аҟны, ҷыдала, иҳәоуп:
"Ихы дақәиҭтәызааит Ҳаразиа Вадим Николаи-иҧа Аҧсадгьыл ахь ахынҳәразы Аҧсны аҳәынҭқарратә еилакы Ахантәаҩы имаҵураҟнытә даҽа усурак ахь ииасра инамаданы. Аҧсадгьыл ахь ахынҳәразы Аҧсны аҳәынҭқарратә еилакы Ахантәаҩыс даҭазааит Дбар Беслана Андреи-иҧа", ҳәа.
Вадим Ҳаразиа Аԥсадгьыл ахь ахынҳәразы Аилак аиҳабыс дҟаҵан 2015 шықәса мшаԥымза 11 рзы.
Дбар Беслан Андреи-иԥа диит ԥхынҷкәын 6 1958 шықәса рзы Гәдоуҭа араион Блабырхәа ақыҭан.
1965 – 1975 шш. рзы Калдахәаратәи абжьаратә школ аҟны аҵара иҵон.
1980ш. рзы далгоит Аҟәатәи арҵаҩратә институт, абиолого-географиатә факультет.
1980 – 1992шш. рзы Блабырхәатәи абжьаратә школ аҟны рҵаҩыс аус иуан, нас ашкол адиректорс дыҟан.
1992 – 1994шш. рзы Гәдоуҭа араион аҵара аҟәша деиҳабын.
1995 — 2002шш. рзы Аԥсны Аҵара аминистр.
2002 ш. рзы Гәдоуҭа араион Ахада.
2017 ш. рзы Пицунда ақалақь Ахада инапынҵақәа неигӡон.
Аҵыхәтәантәи аамҭазы Гагра араион аҵара аҟәша аиҳабыс аус иуан.
