АҞӘА, ажьырныҳәа 23 – Sputnik. Фазиль Искандер 90-шықәса ихыҵра азгәаҭахоит ашәҟәыҩҩы даниз амш хәажәкыра 6 рзы ҳәа Sputnik иазеиҭалҳәеит Аԥсны акультуреи аҭоурыхтә-культуратә ҭынха ахьчареи рминистр Ельвира Арсалиаԥҳа.
"Акомиссиа актәи реилатәараҟны ирылацәажәан ауснагӡатәқәа. Аиубилеи аҽны ауснагӡатәқәа мҩаԥгахоит Аԥснеиԥш анҭыҵгьы", - лҳәеит лара.
Акомиссиа ажәалагалақәа зегьы ирзыӡырыҩны ауснагӡатәқәа рыплан азыԥхьагәанаҭоит.
"Хәажәкыра 6 рзы Москва, Алитературатә музеи аҿы имҩаԥысраны иҟоуп Фазиль Искандер ииубилеи иадҳәалоу аиԥыларақәа. Аԥсны ашәҟәыҩҩцәа реидгыла ажәалагала ҟанаҵеит аԥсышәалеи урысшәалеи аиубилеитә ҭыжьымҭа азырхиазарц", - ҳәа лҳәоит Арсалиаԥҳа.
Аԥснытәи агуманитартә ҭҵаарақәа ринститут ажәалагала ҟанаҵеит ҭагалан имҩаԥгахарц аҭҵаарадырра-практикатә конференциа.
"Аконференциа аклассик ирҿиара аҭҵаара иазкхоит. Искандер ирҿиамҭақәа жәпаҩык рзы адиссертациақәа иртеманы иҟоуп. Аконференциа Искандер иԥсадгьыл, Аԥсныҟа ауаа аднагалоит", - ҳәа азгәалҭоит аминистр.
Иара убасгьы сынтәа имҩаԥысуеит ахәбатәи Жәларбжьаратәи акультура афестиваль.
Акультура аминистр иара убасгьы иазгәалҭеит афестиваль аҳәаақәа ирҭагӡаны ишазыԥхьагәаҭоу Искандер изку Ибрагим Ҷкадуа идокументалтә фильм аԥхьарбара.
Акомиссиа аилатәараҿы ажәадгала ҟаҵан арҵаратә усҳәарҭақәа рҿы ашколхәыҷқәа рыбжьара аиндаҭларақәа еиҿкаазарц.
