03:46 24 Лаҵара 2019
Ишиашоу ицо аефир
  • USD64.49
  • EUR71.84
Валери Бганбеи Даур Ақаҩбеи ДЖәР аҳәынҭқарратә ҳамҭақәа ранаршьеит

Валери Бганбеи Даур Ақаҩбеи ДЖәР аҳәынҭқарратә ҳамҭақәа ранаршьеит

© Foto/ km-ra
Аԥсны
Икьаҿу ахьарԥш аиура
12 0 0

Донецктәи жәлар рреспублика хәышықәса ахыҵра иадҳәалоу агәырӷьаратә усмҩаԥгатәқәа рылахәразы уахь инеит 17 тәылак рҟынтәи асасцәа.

АҞӘА, лаҵара 12 - Sputnik. Донецктәи жәлар рреспублика 5 шықәса ахыҵра инамаданы Соловианенко ихьӡ зху Донецктәи аопереи абалети рмилаҭтә академиатә театр аҟны агәырӷьаратә еилатәараан ДЖәР ахада Денис Пушилин Аԥсны аԥыза-министр Валери Бганба аҩҳәынҭқаррак рыбжьара аиҩызареи аусеицуреи рырӷәӷәараҿы, ДЖәР жәларбжьаратәи авторитет аизырҳараҿы иҷыдоу илшамҭақәа рзы Аиҩызара аорден ианеишьеит. Абри атәы аанацҳауеит Аԥсны Аминистрцәа Реилазаара аофициалтә саит.

Аԥсны Адәныҟатәи аусқәа рминистр Даур Ақаҩба даԥсахеит ДЖәР иҷыдоу адырга "Ареспублика аҿаԥхьа илшамҭақәа рзы", аҳәоит адырраҭараҿы.

Валери Бганба иадныҳәалараҿы дазааҭгылеит Донбасс аҭоурых, иагьазгәеиҭеит Донецктәи жәлар рреспублика амилаҭ ртәыла иаԥшәымацәа иашаны ишыҟалаз, 5 шықәса раԥхьа ироуз ахьыԥшымра иахьа аҽарӷәӷәара ишаҿу шубарҭоу.

"Арҭ 5 шықәса аибашьра аҭагылазаашьа шыҟоугьы, шәара ишәылшеит шәхатә культуреи атрадициақәа еиқәырханы раагара, шәара ижәдыруеит ахақәиҭреи ахьыԥшымреи закәу, мышкымзар мышкы шәара ишәылшоит агәаҟрақәа шәыриааины аҭынч ԥсҭазаара аихаҳара. Аԥсныи Донбасси аиҩызареи аилибакаареи рыбжьоуп. Ҳара наҟ-наҟгьы арҭ аизыҟазаашьақәа ҳарҭбаалоит. Агәра ганы ҳаҟоуп, шәара шәҳәынҭқарра жәларбжьаратәи аилазаара иахәҭакны ишыҟало", - иҳәеит Валери Бганба.

Валери Бганба ДЖәР 5 шықәса ахыҵра иазкыз агәырӷьаратә еилатәараан иқәгылара

Уаанӡа ДЖәР Адәныҟатәи аусқәа рминистрра адырра ҟанаҵеит Донецктәи жәлар рреспублика хәышықәса ахыҵра иадҳәалоу агәырӷьаратә усмҩаԥгатәқәа рылахәразы ишнеиуа 17 тәылак рҟынтәи асасцәа. ДЖәР иаҭааит Урыстәыла, ЛЖәР, Аахыҵ Уаԥстәыла, Аԥсны рофициалтә делегациақәа, иара убас Италиа, Франциа, Бельгиа, Сербиа, Германиа, Австриа, Норвегиа, Финляндиа, Чехиа, Словакиа, Ҭырқәтәыла, Шьамтәыла, ЕАА рҟынтәи аполитикатәи ауаажәларратәи усзуҩцәа.

Валери Бганба даҭааит Донецк еиҿкааз амилаҭтә нхамҩа аихьӡарақәа рцәыргақәҵа>>

2014 шықәса лаҵара 11 рзы Донецктәи жәлар рреспублика имҩаԥнагеит ахалаҟазааразы ареферендум. Адырҩаҽны, лаҵара 12 рзы, ареферендум алҵшәақәа рылаҳәара ашьҭахь, ДЖәР аиҳабыра ареспублика асуверенитет рыларҳәеит.

 

Ихадоу атемақәа