АҞӘА, лаҵара 20 – Sputnik, Бадри Есиава. Аоппозициа Аԥсны азеиԥшмилаҭтә ҿагылареи иҷыдалкаау аҭагылазаашьеи рыларҳәеит лаҵара 20 рзы ахәылбыҽха, абри атәы аҭыԥ аҟынтәи иааицҳауеит Sputnik акорреспондент.
"Иахьатәи амш инаркны Аԥсны азеиԥшмилаҭтә ҿагылара акциақәеи иҷыдалкаау аҭагылазаашьеи рылаҳҳәоит. Абри инамаданы, ауаажәларратә транспорт аусзуҩцәа русура аанкыланы, аҿагыларатә акциақәа ирыдгылоит", - иҳәеит апартиа «Амцахара» ақалақьтә ҟәша ахантәаҩы Мизан Зыхәба.
Иара иажәа иацҵо, иҳәеит ареспубликатә мҩаду аҟны ацҳақәеи амҩақәеи зегьы шаркхо.
Аоппозициа ахаҭарнакцәа Аԥсны Апарламент ахыбра аԥхьа еизеит ахада иалхрақәа ррыцхә ԥхынгәы 21 рҟынтәи ҭагалан ахь аиагаразы адҵа ақәыргыларазы, Аслан Бжьаниа игәабзиара аҭагылазаашьа иахҟьаны алхрақәа рылахәра ахьилымшо иахҟьаны.
Аоппозициа ахаҭарнакцәа изларҳәо ала, Бжьаниа ашҳам илаҵан.
Аԥсны Жәлар Реизара ахада иалхрақәа ррыцхә ԥхынгәы 21 аҟынтәи 2019 шықәса ҭагалан ахь ахыгара мап ацәнакит.
Аԥсны аоппозициатә мчрақәа рхада Аслан Бжьаниа Москватәи ахәышәтәырҭа дҭоуп мшаԥы 18 раахыс. Уи игәабзиара аҭагылазаашьа аиԥш зеиԥшу рыхьны Склифосовски ихьӡ зху ахәышәтәырҭа иҭашәеит уи ихьчаҩцәа Кьасоу Дарсалиеи Леван Бжьаниеи.
Лаҵара 2 рзы аоппозицитә мчқәа апресс-конференциаҿы ирыларҳәеит Аслан Бжьаниа атәыла ахадак иаҳасабала ихьӡ рҳәараны ишыҟоу азы.
Лаҵара 16 рзы аҳәамҭа ҟаҵан Аслан Бжьаниа ишьа артут аланы ишышьақәыргыло, уи иаанаго ашҳамыркра шизуз ауп ҳәа. Аслан Бжьаниа идгылаҩцәа алхрақәа рыҿҳәара инахазарц ажәадгала ҟарҵеит.
Лаҵара 17 рзы Аԥсны Ашәарҭадаратә хеилак еиҿнакааит агәыԥ ҷыда, лаҵара 20 инаркны урыстәылатәи апрокуратура аусзуҩцәа алархәны иҟалаз ахҭыс ҭызҵаауа.
Лаҵара 20 рзы аоппозициатә мчрақәа Реидгыла Аԥсны апарламент аҿаԥхьа амитинг мҩаԥыргоит алхрақәа ҭагалан ахь риагара азҵаара инадҳәаланы.
