АҞӘА, рашәара 22 – Sputnik, Бадри Есиава. Аԥснытәи аспортсмен Енри Агрба Кисловодсктәи аиқәԥарақәа рыламҭалаз ифара-ижәра иагирхеит.
"Иахьа асааҭ 13:00 - 17:00 акапанрақәа мҩаԥгахоит. 77 кьыла уахымсроуп. Убри азы сыфатә иагсырхеит. Иҵаам, ашша злам, ижәны иҟоу мацароуп исфо. Амла сакуеит, аха макьаназ сыҽныскылароуп", - иҳәоит иара.
Агрба Пицунда, Гагра, Шәача аҽазыҟаҵарақәа мҩаԥигон. Ачемпионат ахь днеиуеит иазыҟаҵаҩ Асҭамыр Арсҭаа дицны.
Кисловодсктәи атурнир аԥҟарақәа акыр иӷәӷәоуп. Узақәԥо ихәдаџьал уасыр, икаҳаз шьапыла уисыр ҟалоит. Иҟамлақәо рахь иаҵанакуеит узындаҭло иӷрасреи ила аҭыхреи.
Енри Агрба мышкы ахы-аҵыхәала иакымкәа аиԥыларақәа мҩаԥигароуп.
Уаанӡа, Енри Агрба 2018 шықәса рзы еилаԥсоу аиндаҭларақәа рзы FCF-MMA аверсиала адунеи ачемпион ититул иоухьан.
