АҞӘА, ԥхынгәы 11 – Sputnik. Аҟәа, ԥхынгәы 13 рзы имҩаԥысраны иҟаз абокс азы атурнир "Аԥсны Аҳәынҭқарра ахраҿа" Афон ҿыцҟа ииагоуп ҳәа Sputnik Аԥсны иазеиҭеиҳәеит Аԥсны апрофессионалтә бокс азы Афедерациа ахада Альберт Карди-оӷлы.
"Абокс азы жәларбжьаратәи атурнир аҟәатәи астадион "Динамо" аҿы имҩаԥысраны иҟан, аха, аҳауатә ҭагылазаашьа инамаданы, Афон ҿыцҟа ииагахоит. Аамҭа еиҭакхом, асааҭ 18:00 рзы имҩаԥгахоит. Аҭамзаара шьҭаҳҵоит", - иҳәоит Карди-оӷлы.
Аԥсны ахьӡала атурнир аҿы иқәгылоит 12 спортсмен.
2017 шықәса рзы имҩаԥысыз атурнир иадкыланы уахәаԥшуазар, сынтәа алахәылацәа рхыԥхьаӡара акыр еиҳауп.
"Ҩышықәса раԥхьа ҩыџьа заҵәык ракәын Аԥсны ахьӡала иалахәыз. Уажәы 12-ҩык ыҟоуп. Еиндаҭло дрылоуп аҭыԥҳагьы – Белена Кәыҵниаԥҳа. Абокс адунеи аҿы ари акрызҵазкуа хҭысны иҟалоит. Асеиԥш зымҽхак ҭбаау атурнир Аԥсны раԥхьаӡа акәны имҩаԥысуеит", - еиҭеиҳәоит Карди-оӷлы.
Аԥсныҟа иаараны иҟоуп Урыстәыла, Белоруссиа, Румыниа, Бырзентәыла, Морокко рҟынтәи аспортсменцәа.
Аԥснытәи абоксиорцәа Аолимпиатә резерв ашкол ахь ирыдыркылеит>>
Аԥснытәи аҳауагәаҭаҩцәа иазԥхьагәарҭоит амш аҽеиҭакра. Ԥхынгәы 13 рзы ақәа леираны иҟоуп.
