АҞӘА, нанҳәа 1 – Sputnik. Ԥхынгәымза 31 рзы Аԥсныҟа усуратә визитла диааит Урыстәылатәи Афедерациа ахада ицхырааҩ Владислав Сурков ҳәа аанацҳауеит Аԥсны ахада иофициалтә саит.
Аиԥылара аҳәаақәа ирҭагӡаны Рауль Ҳаџьымбеи Владислав Суркови 2017-2019 шш. Аԥсны Аҳәынҭқарра асоциалтә-економикатә ҿиара ацхрааразы аинвестпрограмма анагӡара азҵаарақәа, иара убас 2020-2022 шш. аинвестпрограмма апараметрақәа ирылацәажәеит.
Аԥсны ахада Рауль Ҳаџьымба асас аԥсшәа иаҳәо иҳәеит:
"Ҳарҭ Аԥсны шәбара ҳаигәырӷьеит. Урыстәылатәи Афедерациеи ҳареи ҳусеицзура активла аҿиара иаҿуп. Ҳинвестпрограмма иаҵанакуа ахыбрақәа, рыргылара, еиҳаракгьы, ашколқәеи ахәыҷбаҳчақәеи рхыркәшарахь инеихьеит. Цәыббрамза 1 азы, шамахамзар, зегьы рышәқәа аатуеит. Аамҭа кьаҿк иалагӡаны ҳҿаԥхьа иқәгылаз адҵақәа рынагӡара ҳалшеит, Урыстәыла аганахьала иҟоу афинанстә цхыраара иабзоураны, урҭ азҵаарақәа ирласны рыӡбара алыршахеит".
Владислав Сурков аҭакс иҳәеит абри аҩыза адкылара агәахәара шинаҭаз.
"Сгәы иахәоит аамҭа ԥшааны сахьшәыдышәкылаз. Ҳарҭ ҳрыхьӡеит аинвестпрограмма иаҵанакуа хыбрақәак рҭаара, ҷыдала, цәыббрамза 1 азы зышәқәа аартхо ашколқәа. Ҳарҭ ҳусеицураҟны афаза бзиаҿы ҳнеит, амчратә еилазаарақәа зегьы аконструктивтә, апрофессионалтә знеишьа рымазартә иҟашәҵеит. Ҳарҭ наҟ-ааҟ ҳаиҳабырақәа аекономикатә усхк аҟны аизыҟазаашьа бзиақәа рыбжьоуп. Алҵшәақәагьы ҳбоит, урҭ уреигәырӷьаратәы иҟоуп," - иҳәеит иара.
Сурков, аԥыза-министр Валери Бганба дицны, Гагреи Гәдоуҭеи робиектқәа дырҭааны ибеит.
Бганбеи Суркови аҭааит Аԥсны Аҳәынҭқарра асоциалтә-економикатә ҿиара ацхрааразы аинвестпрограмма ацхыраарала иргылаз афымцастанциа маҷ "Гагра-1".
АУН "Амшынеиқәафымцамч" адиректор хада Аслан Басариа имҩаԥгоу аусурақәа дрылацәажәеит.
Астанциа маҷ Гагра ақалақь агәы зегьы фымцалашарала еиқәнаршәоит, абонентцәа рхыԥхьаӡара 8 нызқьҩык рҟынӡа иҟоуп.
Ари афымцастанциа 167 миллион мааҭ ақәхарџьуп.
Иара убас шәаԥхьар ҟалоит:
-
Ареспубликатә хәыҷтәы хәышәтәырҭа аремонт Аинвестпрограмма иалалар ауеит
-
Аԥсны араионқәа транспорт ҿыцла еиқәдыршәеит
-
Лыхнытәи Гәдоуҭатәи абжьаратә школқәа аремонт рзыруеит
