АҞӘА, нанҳәа 20 – Sputnik, Бадраҟ Аҩӡба. Аспектакль "Ромеои Џьулеттеи" аԥхьарбара аламҭалаз, Аԥсуа драматә театр аҟны иалацәажәеит ақәыргыламҭа ауыс адуылара шцоз, насгьы уи ҵакыс иамоу аԥсуа культуратә ԥсҭазаараҟны.
Атеатр адиректор хада Нодар Ҷанба иҳәеит аспектакль ақәыргылара даара иуадаҩыз усны иқәгылан уи знапы алазкыз зегь рзы.
"Раԥхьаӡа иргыланы Шекспир иҩымҭа еиҭагаӡамызт, убри азы апоет Геннади Аламиа ҳиҳәеит аиҭагаразы. Ақәыргылаҩцәа рыӡбахә анцәырҵ Адгәыр Ақаҩба иҟны ҳаангылеит, уи даара аԥышәа ду имоуп Аԥсныи уи анҭыҵи аусура аганахь ала", - азгәеиҭеит Ҷанба.
Апиеса аиҭагаҩ Геннади Аламиа иажәақәа рыла, аспектакль ауыс адуылара иара изы даара аҭакԥхықәра зцыз ак акәын.
"Даараӡа аџьабаа снарбеит аиҭагара, зныкгьы саҟәыцырц сыӡбеит, сызлоугалаз закәи ҳәагьы иасҳәахьан арежиссер, аха иҟалеит ҳәа сгәы иаанагоит. Хыхь ажәҩан ахь иԥыруа аракетақәа ианаамҭоу изырԥыруа мблыр, арбита ашҟа изцәырҵӡом. Иагу-иабзоу ахәаԥшцәа ирбап, сара сзы ибзиоуп, ахәаԥшцәа еилыркаар сҭахуп", - иҳәеит уи.
Арежиссиор аҩымҭа, аиҭагамҭа данаԥхьа иара ииҳәарц ииҭахыз иҳәеит асценаҿы, азгәеиҭеит иара. "Сара англыз бызшәа сыздырӡом, аурысцәа рҟны хҩык еиҭаргеит, урҭ зегь еиԥшӡам. Урҭ аиҭагамҭақәа зегь саԥхьа инықәҵаны еилаӡҩаны ак сзалхуазар ҳәа саҿын", - ациҵеит Аламиа.
Асахьаҭыхҩы-ақәыргылаҩ Баҭал Џьапуа иазгәеиҭеит, аспектакль ақәыргылара аан изыцәшәоз амзызқәа ирыцәцеит.
"Аиҳарак ҳзыцәшәоз атеатр аҩнуҵҟа акомпиутер, алашара иадҳәалоу атехника аҭагылазаашьа ауп, уи ҳаиааит. Аҟазара азҵаара салацәажәаӡом, уи ахәаԥшцәа ахәшьара арҭап", - иҳәеит Џьапуа.
Арежиссиор-ақәыргылаҩ Адгәыр Ақаҩба иажәақәа рыла, аусыура иагьыцәгьан иара убри аамҭаз аинтерес аҵан.
"Ҳара хықәкы хадас иҳамаз азҵаарақәа ируакуп аҿар рхы аадырԥшыртә аҭагылазаашьа рыҭара ауп, урҭ Москва, Санкт-Петербург аҵара зҵаз, аԥеиԥш бзиа змоу актиорцәа роуп", - азгәеиҭеит арежиссиор.
Аспектакль "Ромеои Џьулеттеи" ари абзиабара агимн ауп, ақәыргыламҭа аҟны Ромео ироль наигӡоит Бенар Ақаҩба, Џьулетта лроль ҩыџьа инарыгӡоит – Лана Џьапуаԥҳаи, Лоида Ҭыркьԥҳа-Дауҭиеи, иҳеит Адгәыр Ақаҩба.
Аспектакль "Ромеои Џьулеттеи" аԥхьарбара мҩаԥысуеит Самсон Ҷанба ихьӡ зху Аԥсуа драматә театр асценаҟны нанҳәа 21 асааҭ 19:00 рзы.
