00:38 08 Нанҳәа 2020
Ишиашоу ицо аефир
  • USD73.64
  • EUR87.17
Аԥсны
Икьаҿу ахьарԥш аиура
36 0 0

Акциа "Ԥсра зқәым архәҭа" мҩаԥысраны иҟоуп Аԥсны ахы-аҵыхәа: Аҟәа, Пицунда, Гагра, Гәдоуҭа, Афон ҿыц, Очамчыра, Тҟәарчал. Sputnik Аԥсны апресс-центр аҿы имҩаԥысит есышықәсатәи акциа иазку апресс-конференциа.

Бадраҟ Аҩӡба, Sputnik

Акциа "Ԥсра зқәым архәҭа" аиҿкааҩ, Аԥсны Аџьынџьтәылатә еибашьра алахәылацәа аҳәса инвалидцәа Рассоциациа ахантәаҩы Лариса Ҭарԥҳа далацәажәеит ауснагӡатә аҭоурых.

"Ари аидеиа ԥшьышықәса раԥхьа раԥхьаӡа акәны инаҳагӡеит. Иҭахаз ирызкны аинформациа аизгара акыр ауадаҩрақәа аҵан. Аинформациа еизганы, афотосахьақәа ҳкьыԥхьыр акәын. Есыҽнытә аусура мҩаԥысуан. Убри аан иааиуаз ауа-аҭынха ҳарзыӡырҩыр, иҳадаҳкылар акәын", - еиҭалҳәоит лара.

Сынтәа "Ԥсра зқәым архәҭа" иалахәхоит х-нызқьҩык инарзынаԥшуа ауаа.

"Уаанӡатәи ашықәсқәа раан Аҟәа мацара акәын афотосахьақәа ҳаманы ҳахьымҩасуаз. Нас иҳаӡбеит Аԥсны ақалақьқәа зегьы рҿы аныҟәара еиҿаҳкаарц. Ус еиҳа ииашаны иҳаԥхьаӡеит", - лҳәоит Лариса Ҭарԥҳа.

Сынтәа акциа "Ԥсра зқәым архәҭа" мҩаԥысраны иҟоуп Аԥсны ахы-аҵыхәа: Аҟәа, Пицунда, Гагра, Гәдоуҭа, Афон ҿыц, Очамчыра, Тҟәарчал. Гагра имҩаԥгахоит жьҭаара 6 рзы, Афон ҿыц – цәыббра 29 рзы, егьырҭ ақалақьқәа рҿы – цәыббра 30 аҽны.

Аҟәа ақалақь аҿы акциа алахәылацәа еизоит Аԥсуа драматә театр аҿаԥхьа, цәыббра 30 асааҭ 11:00 рзы.

"Акциа алахәылацәа Амҳаџьыраа рыԥшаҳәа ианысны Аидгылара амҩахь инеиуеит. Ахьӡ-аԥша абаҟа амҵаны ашәҭшьыҵәрақәа шьҭарҵоит. Акциа хыркәшахоит Ахақәиҭра ашҭаҿы", - азгәалҭоит лара.

Акциа иалахәхоит ашколхәыҷқәа, астудентцәа, ақалақь ауааԥсыра.

Аилахәыра "А-Мобайл" ауааԥсыра рнырразы аҟәша аусзуҩ, акциа ацшьаҭаркыҩ Асҭанда Чкадуаԥҳа илҳәеит ауснагӡатә аиҿкаара алахәхара акырӡа шаҵанакуа.

"Даара ҳџьабаа адаҳҵеит акциа аиҿкаара. 2016 шықәса рзы, ҳалагамҭаз, иаабеит акциа есышықәса имҩаԥырго акакәны ишыҟалоз. Аиааиреи Ахьыԥшымреи рымш аҽны ауаа ргәқәа хыҭхыҭуа иазыԥшуп абри амҩа анысра", - лҳәеит лара.

"Ԥсра зқәым архәҭа" – зеиԥшжәлартә акциахеит, абиԥарақәеи амилаҭқәеи еиднакылоит ҳәа азгәалҭеит Асҭанда Чкадуаԥҳа.

Раԥхьаӡа акәны иара мҩаԥган цәыббра 30 2016 шықәса рзы. Иалахәын ҩ-нызқьҩык инарзынаԥшуа ауааԥсыра. Аԥсны атәылауаа Аҟәа ақалақь амҩа хадақәа ирнысит ргәакьацәа рфотосахьақәа рыманы.

Иара убас шәаԥхьар ҟалоит:

Ихадоу атемақәа