АҞӘА, жьҭаара 8 – Sputnik, Бадраҟ Аҩӡба. Аԥсны Аҭагылазаашьа ҷыдақәа рминистрраҿы Аԥсны иҟоу Урыстәыла ахьчараз Афедералтә маҵзура аусзуҩ Сергеи Иурышев иӡааҟәрылоз ауаҩԥсы дахьеиқәирхаз азы ианаршьеит аҳаҭыртә шәҟәы, Sputnik иазеиҭеиҳәеит Аԥсны АҶА зышәага кьаҿу аӷбақәа рзы аҳәынҭинспекциа аиҳабы Ҭенгиз Сабуа.
"Ахҭыс аҭыԥ аман Пицунда, цәыббра 13 рзы. Амшын аҟәара 30 метра рҟынӡа инацәыхараны ахаҵа аӡааҟәрылара далагеит. Аԥсны иҟоу Урыстәыла ахьчараз Афедералтә маҵзура аусзуҩ Сергеи Иурышев иҟалаз шибазҵәҟьа иаразнакы уахь иҿынеихеит дыӡсо. Аӡаҿы ауаҩы иеиқәырхара зегьы ирылшом", - иҳәеит Сабуа.
Аҳаҭыршәҟәы анашьара ацеремониа мҩаԥысуан Аԥсны Аҭагылазаашьа ҷыдақәа рминистрра азал ду аҿы. Аҳаҭыртәшәҟәы Сергеи Иурышев инапаҿы ииркит Аԥсны АҶА аминистр ихаҭыԥуаҩ, аинрал-маиор Нугәзар Емырхәба.
