АҞӘА, абҵара 9 – Sputnik. Ацитрус шәырқәа рекспорт абҵара 7 рзы 2018 шықәсазтәи аамҭа иаҿырԥшны хәынтә еиҵахеит иҳәеит арадио Sputnik аинтервиу азҭаз аҳазалхратә ҭыԥ "Ԥсоу" аиҳабы ихаҭыԥуаҩ Ҭемыр Лашәриа.
Иара иажәақәа рыла, 2018 шықәса абҵара 7 рзы ареспублика иалган 822 тонна, сынтәа – 167 тонна.
"Сынтәа Аԥсны амандарина ҽаҩра хәынтә еиҵахеит. Амандарина аамҭа-аамҭала аҽаҩра аҽаԥсахлоит. Уи ауп изыхҟьаз", - иҳәеит иара.
Аҳазалхратә ҭыԥ "Ԥсоу" аиҳабы ихаҭыԥуаҩ Ҭемыр Лашәриа иазгәеиҭеит ахазхаҿы знык ала аҳәаа 25 кьыла ахыгара азин шимоу. Еиҳау апартиа ахыгараан аалыҵ аҳәаанырцә иаазхәо ауаҩи уареи аиқәшаҳаҭра шәымазароуп. Иҟазароуп ахәԥса-фактура, атранспорттә шәҟәқәа, Аҳәынҭстандарти акарантинтә хылаԥшреи рсертификат ҳәа.
Партиа дула амандаринақәа рахыгараан Аԥсны аҳазалхратә усбарҭа атауар ахәԥса аҟынтәи 0,1 % ахнахуеит.
"Тоннак амандарина аиагараан бжьаратәла 20 000 мааҭ ахыххоит", - иҳәеит иара.
Урыстәылатәи аҳазалхыҩцәа анаплакыҩцәа ашәахтәцҵа 20% ахырхуеит.
"Урыстәылеи ҳареи ҳаиқәшаҳаҭрала Аԥсны иаарыху аалыҵ аҳазалхратә баџь иаҵанакӡом. Атауар ахыҵхырҭа ашьақәырӷәӷәаразы Ахәаахәҭра-ааглыхратә палата асертификат умазароуп", - иҳәоит Лашәриа.
Аҵыхәтәантәи ашықәсқәа рзы зхала атауар ахызго ахазхаҿқәа рхыԥхьаӡара акыр еиҵахеит.
Усеиԥш иҟоу ауаагьы аҳәааҿы атачкистцәа рхы иадырхәоит, убри аан 25 кьылоуп ззин рымоу аиагаразы знык ала.
Аиҳарак ацитрусқәа партиа дула аҳәаа иахыргоит.
Аԥсны Ақыҭанхамҩазы аҳәынҭеилакы 2019 шықәсазтәи азыԥхьагәаҭарақәа рыла Аԥсны ацитрусқәа рекспорт 10 000 тонна рҟынӡа еиҵахеит. Иагьышьақәнаргылоит 20 000 тонна.
Иара убас шәаԥхьар ҟалоит:
-
Аԥсуа ҭагалан ахьыршәыгәқәа: амандарина, афеихоа, ахәырма
