Сынтәа Аԥсны амандарина аҽаҩра ҵыԥх аасҭа еиҵоуп. 2019 шықәса цәыббрамзеи жьҭаарамзеи ирылагӡаны х-тоннак амандарина рыда Аԥсны иалганы ирзымҭиӡеит. Арҭ арбагақәа ҵыԥх абри аамҭа инақәыршәаны иҟаз раасҭа ҩынтә еиҵоуп.
Аҳәынҭқарратә ҳазалхратә еилакы сынтәатәи аекспорт иааизакны 20 тонна ҟалоит ҳәа иазԥхьагәанаҭоит, уи 2018 шықәсазы аасҭа 10 тонна рыла еиҵоуп. Аекспертцәа изларҳәо ала, уи зыхҟьаз амармалташьтә пты акәӡам, уи зыхҟьо ацитрустә шәырқәа есышықәса инеибеиԥшны аҽаҩра бзиаа ахьырзаамышьҭуа ауп. Аминистрцәа Реилазаара аӡбарала, кьылак амандарина аахәараан 19 мааҭи 50 копеи иаԥсоуп.
Афеихоаи ахәырмеи ракәзар, сынтәатәи урҭ рҽаҩра акыр еиҳауп ҵыԥхтәи аасҭа. Сынтәа Аԥснынтәи Урыстәылаҟа ииагахоит 47 тонна афеихоа, уи ҵыԥх аасҭа 36 тонна рыла еиҳауп. Бжьаратәла аахәаратә хәыԥса иартәоит 20 мааҭ, Аԥсны аџьармыкьақәа рҟны кьылак афеихоа рҭиуеит бжьаратәла 80 мааҭ ҳәа, Урыстәыла - 100 мааҭк инарзынаԥшуа. Аԥсны аҭҵаарадырратә ақыҭанхамҩатә институт аҟны иаадрыхуеит афеихоа аексперименталтә хкқәа 50 раҟара. Урҭ ахкқәа реиҳарак аԥснытәи аҵарауаа-агрономцәа роуп иаԥызҵаз, иагьрырҭеит аԥсуа "хьӡқәа": "ацха", "аԥсуа", "гәылрыԥшьтәи", "амра", "амза". Аекспертцәа арҭ ахкқәа рыԥшрала, рышәагаала, ргьамала еиҩырдыраауеит. Иҟоуп еиҳа излоуи иара убас еиҳа иҵәыҵәуи.
Ахәырма акәзар, 2019 шықәса цәыббрамзеи жьҭаарамзеи рзы 26 тонна Аԥсны иалганы ирҭихьеит.
Иара убас шәаԥхьар ҟалоит:
-
Ҩымз рыҩныҵҟа Аԥсны аҳәаа иахыргахьеит 47 тонна афеихоа
-
"Аԥсуа лакә" аалыҵ: ашоколад зхьыршоу ахәырма
