Аԥсҭазаара аинтерес ззаҵоу рзы: Sputnik аҟны Ажурналист қәыԥш ишкол аатит

АҞӘА, ажьырныҳәа 27– Sputnik. Sputnik Аԥсны амультимедиатә пресс-центр аҿы ажьырныҳәа 27 рзы иаатит Ажурналист қәыԥш ишкол.

Ажурналист қәыԥш ишкол аатит апроект SputnikPro аҳәаақәа ирҭагӡаны. Ажурналистика амаӡақәа Ашкол аҵаҩцәа ирызцәыригоит МИА "Россия сегодня" абжьгаҩ, Sputnik аколумнист Олег Дмитриев.

Апроект ахь ауаа мызкы иназынаԥшуа иалырԥшаауан. Асеминарқәа рылахәхаразы апретендентцәа арезиуме нарышьҭуан зых иақәиҭу аформала, иҩтәын автортә ессе "Сара ажурналистика залысхуа", атема "Сықалақь" ала быжь-фотосахьак злоу афотонҵамҭа ырмазеитәын, досу иқалақь иазку ҩ-минуҭктәи авидео ҭыхтәын, зых иақәиҭу атемала авидеоинтервиу ҭыхтәын.

29-ҩык рҟынтәи 12-ҩык алкаахеит. Дмитриев иажәақәа рыла, ара еизеит "аԥсҭазаара аинтерес змоу ауаа".

"Ауаҩы аԥсҭазаара аинтерес шизаҵоу анубалак, уи иеиҭеиҳәо угәаҵанӡа ианнеиуа, апроблемақәа рыӡбара иазнеишьа анунырлак, аус зицумурызеи", - иҳәеит Дмитриев.

Амедиапроект Ажурналист қәыԥш ишкол аусура мҩаԥысуеит Sputnik Аԥсны амультимедиатә пресс-центр аҿы ажьырныҳәа 27 - 30 рзы. Актәи аҽазыҟаҵараан алахәылацәа ирзеиҭарҳәеит апрограмма ахықәкқәеи инанагӡаша аусмҩаԥгатәқәеи. АИХ рҟны рхықәкытә аудиториазы идыртәу рзеиҭарҳәеит. Уи адагьы ирарҳәеит ииашаҵәҟьоу ажәабжьқәа имцырку излареиҩудырааша, иаармарианы аҭоурых кьаҿ шыҩтәу, иара убас анҵамҭа ахьӡ ауаа аднаԥхьалартә ишазхәыцтәу.

Аслан Аршба Ажурналист қәыԥш ишкол аӡбахә аниаҳа ашьҭахь иӡбеит ихы ԥишәарц. Иара АИХ инапы алакым, аилахәыра "Аҟәафон" атехникатә департамент аҿы аус иуеит. Аха Аслан иҳәеит иара атекстқәа рыҩраҿы имчқәа шԥишәахьаз.

"Ажурналистика – хоббиуп сара сзы. Аха занааҭс исоур бзиа избоит. Ашкол аформат сгәаԥхеит. Амедиа аусхк аҟны аҵараҵара ҳтәылазы иактуалны избоит", - иҳәеит иара.

Арҵаратә программа SputnikPro – урыстәылатәи амедиаменеџьерцәеи АИХ рҟны аԥышәа ду змоу аҟазауааи имҩаԥырго аӡыргарақәеи амастер-классқәеи рсериоуп. Апрограмма иӡырнагоит ҳаамҭазтәи амультимедиатә информмаҵзурақәа русура атехнологиақәеи астандартқәеи.

Раԥхьатәи амастер-классқәа рсериа мҩаԥысит Минск. Урыстәылатәи АИХ-қәа раԥхьаӡа акәны имҩаԥыргоит асеиԥш иҟоу апрограмма. Мраҭашәаратәи АИХ-қәа ракәзар, абри аус рнапы алакуижьҭеи акрааҵуеит.

Sputnik-и МИА "Россия Сегодня"-и рхаҭарнакцәа ажурналистцәа ирымардоит аинтерес аҵоуп ҳәа ирыԥхьаӡо аԥышәа. Апрограмма SputnikPro аус ауеижьҭеи рҽаладырхәхьеит 80 рҟынӡа тәыла.

Иара убас шәаԥхьар ҟалоит:

• Габуниа SputnikPro иазкны: иҳауз адырра аԥхьаҟа ҳхы иаҳархәартә иҟоуп

• SputnikPro ажурналистцәа рзы асессиа мҩаԥнагеит

• Sputnik Аԥсны анапхгаҩы иинтервиу: шьаҿа-шьаҿала еиҳау аихьӡарақәа рахь