АҞӘА, ажьырныҳәа 29 - Sputnik. 2020 шықәса рзы ConIFA анапхгарала ашьапылампылтә чемпионат аҟны Аԥсны еизгоу ашьапылампылтә команда ықәгылаӡом аквалификациатә очкоқәа азхара ахьыҟамыз азы, Sputnik Аԥсны иазеиҭеиҳәеит ConIFA ахада ихаҭыԥуаҩ Дмитри Паӷәаа.
Паӷәаа иҳәеит ачемпионат иалахәу акомандақәа зегьы атурнир аԥҟарақәа ирықәныҟәалароуп, ареитинг аҟны аҩаӡара ҳарак аиуразы аквалификациатә хәмаррақәа мҩаԥыргалароуп ҳәа. Иара иҳәеит есышықәсатәи ачемпионатқәа рыдагьы аиҩызаратә еиндаҭларақәа мҩаԥгалатәуп ҳәа.
Ажьырныҳәа 26 рзы имҩаԥган аҵәҭаԥсара. Уи ConIFA асаит аҟны иӡырган.
ConIFA аверсиала адунеитә чемпионат 2020 шықәса рзы имҩаԥысуеит лаҵара 30 инаркны рашәара 7 рҟынӡа. 2020 шықәса рзы ConIFA аверсиала ашьапылампыл азы адунеи ачемпионат мҩаԥысраны иҟоуп Аҩадатәи Македониа аҳҭнықалақь Скопье аҿы.
Атурнир Сомалиленд амҩаԥгара азԥхьагәаҭан, аха аиҿкааҩцәа уи аҭыԥ рыԥсахит акомандақәа жәпакы афинанстә ҭагылазаашьа инамаданы уахь ацара ахьырцәыуадаҩхаз иахҟьаны.
2019 шықәса рзы ачемпионат мҩаԥган Ашьха Ҟарабах. Аԥснытәи акоманда ахԥатәи аҭыԥ ааннакылеит. Актәи аҭыԥ ргеит Алада Уаԥстәыла аспортсменцәа.
2016 шықәса рзы ConIFA ачемпионат Аԥсны ианымҩаԥысуаз аԥснытәи акоманда актәи аҭыԥ анашьахеит.
Ихьыԥшым ашьапылампылтә ассоциациақәа Рконфедерациа ConIFA, шьаҭаркын рашәара 7 2013 шықәса рзы. Иахьазы иара еиднакылоит 40 команда.
