АҞӘА, мшаԥы 4 - Sputnik. Аԥсны ауааԥсыра акоронавирус аҟынтәи рыхьчаразы аоперативтә штаб иҳаҩсыз уахыки-ҽнаки рзы иҟоу аҭагылазаашьа атәы рҳәеит. Уаанӡеиԥш, Аԥсны акоронавирус зыхьыз ҳәа аӡгьы дыҟам. Абри атәы Агәабзиарахьчара аминистрра Facebook адаҟьаҟны ицәырыргеит.
"Аҟәа аҿкычымазаратә хәышәтәырҭахь аӡәы дадҵаалеит, уи изықәыргылан адиагноз ОРВИ. Гәдоуҭа ақалақь Араионтә хәышәтәырҭа хада иадҵаалеит ҩыџьа ачымазцәа, урҭ акоронавирус рыдбалам", - иҳәеит Аԥсны Агәабзиарахьчареи асоциалтә еиқәыршәареи рминистр ихаҭыԥуаҩ Алхас Конџьариа.
Конџьариа иара убас зегьы иргәалаиршәеит аҭагылазаашьа ҷыда арежим иқәныҟәар шахәҭоу, зда ԥсыхәа ыҟам ак акәымзар, рыҩнқәа ирдәылымҵырц аҳәара ҟаиҵеит.
Акоронавирус иадҳәалоу аҵыхәтәантәи ажәабжьқәа шәрыԥхьар ҟалоит абра>>
