АҞӘА, мшаԥы 21 - Sputnik. Акоронавирус апандемиа иазкны имҩаԥысыз Қырҭтәыла аԥыза-министр Георги Гахариеи Европатәи акомиссиа ахантәаҩы Урсула фон дер Лиаени рвидеоконференциаан иалацәажәан "аоккупациа зызуу аҵакырақәа рҟны аҭагылазаашьа уадаҩ", убри аан апандемиатә ҭагылазаашьа аполитикатә спекулиациа иамаҭәарны иҟаҵаны ҳәа аҳәамҭа ҟарҵеит Аԥсны Адәныҟатәи аусқәа рминистрраҿы.
Иҟоу аҭагылазаашьа аполитика иадҳәаламкәа иаанымхеит ҳәа азгәарҭеит аминистрраҿы.
"Адунеи зегь зыршьамхнышлаз акоронавирус апандемиаҵәҟьагьы Қырҭтәыла аполитикатә спекулиациа иамаҭәарны иахәаԥшуеит, Аԥсны Аҳәынҭқарра адунеитә уаажәларра рҿаԥхьа ахьӡ аларҟәра рҽазыршәоит. Угәы унамырхьыр алшом Қырҭтәыла аиҳабыреи европатәи урҭ рыдгылаҩцәеи Аахыҵ Кавказ иҟоу иобиективу аполитикатә ҭагылазаашьа иаҿагыло ариторика рҳәамҭақәа рҿы ахархәара ахьарҭо. Иааҟәымҵӡакәа ахархәара арҭоит атермин "аоккупациа зызуу аҵакырақәа". Асеиԥш иҟоу апровокациатә политика Евроеидгыла акгьы ахьахырымҳәаауа угәы иалымсыр ауам", - ҳәа аҳәоит аминистрра аҳәамҭаҿы.
Иахәҭаны иҳаԥхьаӡоит Аԥсны аҳәынҭқарра ихьыԥшым ҳәынҭқарраны, Қырҭтәыла акала иадҳәалам тәылан ишыҟоу аҽазныкгьы инаҵшьны иазгәаҳҭарц. Аԥсны аинтересқәа акала ирыдҳәалоу иарбанызаалак азҵаарақәа иара ахаҭарнакцәа аламкәа рылацәажәара исуверентәу аҳәынҭқарра аҩнуҵҟатә усқәа ахрылагалара акәны ҳахәаԥшуеит ҳәа инаҵшьны иадырбоит адәныҟаполитикатә усҳәарҭаҿ.
Евроеидгыла ахаҭарнакцәа ииашаҵәҟьаны Аԥсны Аҳәынҭқарра ацхыраара аҭара рҭахны иҟазар, Аԥсни Евроеидгылеи ишиашоу реицәажәарала имҩаԥгахар алшоит ҳәа аҽазныкгьы агәаларшәара ҟанаҵоит Аԥсны ААР.
Акоронавирус иадҳәалоу ҳажәабжьқәа зегьы шәрыԥхьар ҟалоит абра>>
