АҞӘА, лаҵара 13 - Sputnik. Афинансқәа рминистрреи ашәахтәеизгареи аҳазалхратәи усбарҭақәеи русеицурала лаҵара раԥхьатәи жәамш рзы иалыршахеит 80 миллион мааҭ абиуџьет ахь инеиртә аҟаҵара. Абри атәы иҳәеит Владимир Делба аԥыза-министр имҩаԥигаз аилацәажәараан.
Делба иажәақәа рыла, арҭ аԥарақәа иалдыршоит аҭыԥантәи абиуџьетқәа цхыраагӡак аҳасаб ала абиуџьет усхк аусзуҩцәа рулафахәы аларшәарц рыҭара.
Аиҳабыра рхада инапынҵала аминистрра ауснагӡатәқәа мҩаԥнагоит агәабзиарахьчареи аҵареи русбарҭақәа русзуҩцәа руалафахәы рызшәара 50 миллион мааҭ ирҭагӡаны.
Делба иҳәеит иҟоу аҭагылазаашьа иаҿырԥшны ареспублика Атәанчахәытә фонди Гагра араион абиуџьети заанаҵы абиуџьетбжьаратә цхыраарацҵа шрыҭаз. Иара убасгьы иҳәеит мшаԥымзазтәи ашәахтәшәарақәа рзы ауал 157 миллион мааҭ ишацлаз.
Аԥыза-министр ихаҭыԥуаҩ, аекономика аминистр Кристина Озган аилацәажәараан илҳәеит аминистрра иҟоу аҭагылазаашьа анализ азыҟаҵара нап шанаркыз аекономика аганахьала хра аманы иҟоу алҵразы.
"2017-2019 шықәсазтәи Аинвестпрограмма анагӡашьеи 2020-2022 шықәсазтәи апрограммеи рыҭҵаара ҳалагеит. Ареспублика аҳәынҭеилахәырақәеи анаплакқәеи рҭагылазаашьа анализ азыҟаҳҵоит урҭ рфинанстә ҭагылазаашьа аилкаарази ахылаԥшра рыҭарази", - лҳәеит Озган.
Аԥыза-министр Александр Анқәаб анапынҵа ҟаиҵеит Аиҳабыра рекономикатә блоки дареи аинырра рымазаарц иҟалар зылшо иманшәалам аекономикатә хҟьаԥҟьақәа раԥырҟәҟәааразы.
Иара убас шәаԥхьар ҟалоит:
-
Анқәаб аекономика аминистр ҿыц аколлектив дыдирдырит
-
Мшаԥымзазы алагалақәа лаҟәит: ашәахтәқәа рзы аминистри аԥыза-министри еилацәажәеит
