07:15 01 Жьҭаара 2020
Ишиашоу ицо аефир
  • USD78.78
  • EUR92.43
Аԥсны
Икьаҿу ахьарԥш аиура
Ачымазара ҿкы – акоронавирус Аԥсни адунеи аҿи: иалкаау (724)
44 0 0

Ииасыз уахыки-ҽнаки рзы Аԥсны акоронавирустә инфекциа рымоу ирымаму азы атестқәа ирхыжьын 88-ҩык ауааԥсыра.

АҞӘА, лаҵара 18 - Sputnik. Аԥсны иахьаҵанакуа даҽа ԥшьҩык ачымазара ҿкы шрылоу шьақәырӷәӷәахеит, абри атәы аанацҳаит Ауааԥсыра акоронавирус рацәыхьчаразы аоперативтә штаб.

Ҿыц ачымазара зыдбалоу зегьы ааигәа Урыстәылантәи ихынҳәыз, Аҟәатәи асасааирҭа "Аиҭар" аҟны аҽыԥхьакратә режим иқәныҟәоз аԥсуа курсантцәа роуп. Ари адиагноз ззықәыргылаз зегьы Гәдоуҭатәи ахәышәтәырҭахь ирышьҭуеит ахәышәтәразы.

Иара убас иазгәаҭоуп аҩаша, лаҵара 19 рзы асасааирҭа "Аиҭар" аҟны акарантин зхызго 52-ҩык арратә курсантцәа аҩныҟа иоурышьҭуеит ҳәа. Урҭ акоронавирус азы атестқәа ирхыжьын, иагьышьақәырӷәӷәан ачымазара ҿкы шрылам.

"Иацы Гәдоуҭатәи ахәышәтәырҭа иҭашәаз апациентцәа хҩык рҭагылазаашьа хар амам, аицәахара иаҿым", - ҳәа аанацҳауеит аоперативтә штаб адырраҭара.

Зыӡбахә рымоу лаҵара 5 рзы Шәачантәи иааз ҩыџьа злахәу аҭаацәа роуп.

Атәыла асанитартә ҳақьым хада Лиудмила Скорик ашәахьа, лаҵара 18 рзы Sputnik аинтервиу аналҭоз излалҳәаз ала, адунеи аҿы апандемиа рыларҳәеижьҭеи Аԥсны акоронавирус зыхьхьоу рхыԥхьаӡара 21-ҩык ыҟоуп. Убас ала, иахьатәи аамҭазы Аԥсны иахьаҵанакуа мшаԥымза аахижьҭеи уажәшьҭа 25-ҩык акоронавирус рыхьхьеит.

Мшаԥымзазы Аԥсны акоронавирус рыдбалан хҩык Гагра ақалақьуаа. Ҩыџьа ргәы бзиахеит, 1925 шықәсазы ииз ахԥатәи ачымазаҩ лыԥсҭазаара далҵит. Агәабзиарахьчара аминистрра лаҵара 16 азтәи адыррақәа рыла Гәдоуҭатәи ахәышәтәырҭаҟынтәи акурсантцәа руаӡәк дҭырҩааит.

Акоронавирус иадҳәалоу егьырҭ ажәабжьқәа шәрыԥхьа ҟалоит абра>>

Атемақәа:
Ачымазара ҿкы – акоронавирус Аԥсни адунеи аҿи: иалкаау (724)

Ихадоу атемақәа