АҞӘА, ԥхынгәы 27 - Sputnik. Аԥсны иҟоу Урыстәылатәи арратә округ аруаа амодультә система ҿыц "Колесо" аус адулара иалагеит аҽазыҟаҵаратә аамҭаан ҳәа аанацҳауеит арратә округ апресс-маҵзура.
Планлатәи аҽазыҟаҵарақәа мҩаԥысуеит аполигонқәа Ҵабали Нагвалоуи рҟны. Аҽазыҟаҵарақәа ирыдыԥхьалоуп 1,5 нызқьҩык рҟынӡа аруаа, ахархәара рыҭоуп 200 ак арратә техника.
"Асистема ҿыц ала арҟәшақәа рҽазыҟаҵара еихшаны имҩаԥгахоит. Аҽазыҟаҵарақәа ирыҵаркуеит аибашьра атеориа, арҵаратә классқәа рҿы анапхгараҭара аҵара, арҵаратә базаҿ ироуз адыррақәа Аԥсны аполигонқәа рҿы рхархәара – ашьхараҿи амшын аԥшаҳәаҿи практикала. Убри аан аҽазыҟаҵарақәа рҭыԥқәа рыԥсахра есымчыбжьа имҩаԥысуеит", - аҳәоит адырраҭараҿы.
Мызкы иалагӡаны аруаа ҩымчыбжь атеориа рҵоит, ирымоу адыррақәа шьақәдырӷәӷәоит, аҽа мчыбжьык аполигон аҿы апрактика иахысуеит.
"Аҵаратә программа иазыԥхьагәанаҭоит 50% рҟынӡа ҽазыҟаҵара ахысразы, ашьхараҿи уахынлеи атехника арныҟәаразы", - ҳәа аҳәоит апресс-маҵзура адырраҭара.
Иҷыдоу азхьаԥшра арҭоит абџьари арратә техникеи рыхк ҿыцқәа рнапахьы раагара, атанкқәа Т-72Б3, акәылӡытранспортиорқәа БТР-82А, аршьаҟауаа рмашьынақәа БМП-3 уҳәа реиԥш иҟоу налаҵаны.
